ފުވައްމުލައް ސިޓީގައި ބޭއްވި ނޫސްވެރިން ތަމްރީނު ކުރުމުގެ ކޯސް ފުރިހަމަކުރި 26 ދަރިވަރުންނަށް ހަނދާނީ ލިއުން ދީފިއެވެ.
ޝަހީބު މީޑިއާ އާއި ފުވައްމުލައް ސިޓީ ކައުންސިލް ގުޅިގެން މި މަހުގެ 9-13 އަށް ބޭއްވި 18 ގަޑިއިރުގެ "ނޫސްވެރިކަމުގެ ތަމްރީނު ކޯސް" ނިންމި ދަރިވަރުންނަށް ހަނދާނީ ލިއުން ބައްސަވައިދެއްވި ރޭ ބޭއްވި ހަފުލާއެއްގައި ފުވައްމުލަކު މޭޔަރ އިސްމާއިލް ރަފީގެވެ. ރޭގެ ހަފުލާގައި ޑެޕިއުޓީ މޭޔަރ މުހައްމަދު ފިކުރީގެ އިތުރުން ބައެއް ކައުންސިލަރުންނާއި ބައެއް މުވައްސަސާތަކުގެ ވެރިން ވެސް ބައިވެރިވަޑައިގަތެވެ. އަދި ކޯހުގެ އިންސްޓްރަކްޓަރެއް ކަމުގައިވާ "އަދަދު އޮންލައިން"ގެ ޗީފް އެޑިޓަރ ހުސެއިން ފިޔާޒު މޫސާ ވެސް ބައިވެރިވެވަޑައިގަތެވެ.
ރޭގެ ހަފުލާގައި ޝަހީބު ދެއްކެވި ވާހަކައިގައި ރާއްޖެ މިއަދު މި ދެކޭ ނޫސްވެރިކަމުގެ ބައްޕައަކީ ފުވައްމުލަކަށް އުފަން، ފުވައްމުލަކުގެ ދަރިއެއް ކަމަށްވާ، ހަވީރު ނޫހުގެ ޗެއާމަން ޑރ. މުހައްމަދު ޒާހިރު ހުސެއިންކަން ފާހަގަ ކުރައްވައި، އެ މަނިކުފާނަކީ ޝަހީބުގެ ނޫސްވެރިކަމުގެ ބައްޕަ ކަމުގައިކަން ވެސް ފާހަގަކުރެއްވިއެވެ. އަދި މޮޅެތި ލިއުންތައް ލިއުއްވުމަށް ޝަހީބަށް އެންމެ ބޮޑަށް އެހީތެރިވެދެއްވައި މަގު ދައްކަވައިދެއްވި ބޭފުޅަކީ ވެސް، އަދި ރާއްޖޭގެ މީޑިއާއަށް ހަވީރު ނޫހުން ގެނައި ޓެކްނޮލޮޖީގެ އިންގިލާބުގެ މޭސްތިރިއަކީ ވެސް ފުވައްމުލަކަށް އުފަން، ފުވައްމުލަކުގެ ދަރިއެއް ކަމަށްވާ ޑރ. އަލީ ރަފީގުކަން ފާހަގަކުރެއްވިއެވެ. އަދި މޭޔަރ އިސްމާއިލް ރަފީގަކީ ޑރ. އަލީ ރަފީގުގެ ކޮއްކޮކަން ފާހަގަކުރައްވައި، ފުވައްމުލަކުގައި ނޫސްވެރިކަމުގެ ދަންމަރު އަލުން ދިއްލެވުމަށް އިސްމާއީލް ރަފީގު ކުރައްވާ މަސައްކަތަށް ތައުރީފު ކުރެއްވިއެވެ.
ޝަހީބު މީޑިއާއަކީ ދިވެހި މީޑިއާ ހެޔޮ ގޮތުގައި ދަމަހައްޓައިދީ ކުރިއަރުވައިދޭނެ ޒިންމާދާރު ނޫސްވެރީން ތަމްރީނުކުރުމާއި، ޒުވާނުންނަށް މީޑިއާގެ ދާއިރާއިން ވަޒީފާގެ ފުރުސަތުތައް ތަނަވަސްކޮށްދިނުމާއި މީޑިއާ މެނޭޖުކުރުމާއި މީޑިއާ މާކެޓިން އަދި ޕްރޮމޯޝަނާ ގުޅޭ އެކިއެކި މަސައްކަތް ކުރުމުގެ މަގުސަދުގައި 2010 ގައި މިނިސްޓްރީ އޮފް އިކޮނޮމިކް ޑިވްލޮޕްމަންޓުގައި ރަޖިސްޓްރީކޮށްފައިވާ، ރާއްޖޭގެ ނޫސްވެރިކަމުގައި 30 އަހަރުގެ ތަޖުރިބާ ހޯއްދަވައިފައިވާ މުހައްމަދު ޝަހީބު ހިންގަވާ "މީޑިއާ ހައުސް" އެެކެވެ. ރާއްޖޭގައި އެންމެ ގިނަ އަދަދަކަށް ނޫސްވެރިން ތަމްރީނުކުރައްވައިފައި ވަނީ ވެސް ޝަހީބެވެ.
ޝަހީބު މީޑިއާއިން އިންތިޒާމްކުރި ނޫސްވެރިންގެ ތަމްރީނު ޕްރޮގްރާމްތައް 2010 އިން ފެށިގެން ރާއްޖޭގެ އެކި ކަންކޮޅުތަކުގައި ވަނީ ހިންގައިފައެވެ. މިގޮތުން، މާލެ އާއި އައްޑޫގެ އިތުރުން ކުޅުދުއްފުށީގައި ވެސް ވަނީ ނޫސްވެރިކަމުގެ ތަފާތު ކޯސްތައް ހިންގައިފައެވެ.
advertisment
