ހދ. ނޮޅިވަރަންފަރުގައި މިރޭ ފެށި ފިރިހެނުންގެ ވެޓަރަންސް ވޮލީ މުބާރާތުގެ ފުރަތަމަ މެޗު ވައިސޫރި ޓީމު ކާމިޔާބުކޮށްފިއެވެ.

އުމުރުން 35 އަހަރުން މަތީގެ ކުޅުންތެރިންނަށް ހުޅުވާލައިގެން، ޖުމްލަ ފަސް ޓީމުގެ މެދުގައި ކުރިއަށްދާ "ފުޑްބައިޓް ވެޓަރަންސް މެންސް ވޮލީބޯލް ޓޯނަމަންޓު" ހުޅުވައިދިން މެޗު ވައިސޫރި ކާމިޔާބުކުރީ "ހަވަރު" ޓީމާ ވާދަކޮށް 3-1 ސެޓުންނެވެ. ފޯރިގަދަވި މި މެޗުގެ މޮޅު ކުޅުންތެރިޔަކަށް ހޮވުނީ ވައިސޫރީގެ އަބްދުއްސަމަދު މުހައްމަދެވެ.

މުބާރާތް ހުޅުވި މެޗުގެ ޝަރަފުވެރި މެހެމާނަކީ ގައުމީ ވޮލީ ކެޕްޓަން އަލީ ހުޒާމެވެ.

މިރެއިން ފެށިގެން މި މަހުގެ 25ގެ ނިޔަލަށް ކުރިއަށްދާ މި މުބާރާތުގައި ދެން ވާދަކުރަނީ އެވޭލާ، ބުރަކި އަދި ބެއްލޯއެވެ. މާދަމާ ރޭ ކުޅޭނީ އެވޭލާ އާއި ބުރަކި ޓީމެވެ.

މި މުބާރާތް ކުރިއަށް ދަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ ވާދަކޮށް، އެންމެ ގިނަ ޕޮއިންޓް ހޯދާ ދެ ޓީމު ފައިނަލަށްދާ ގޮތަށެވެ. ފައިނަލް މެޗު އޮންނާނީ މި މަހު 25 ވަނަ ދުވަހުގެ ރެއެވެ.

އިތުރު ފޮޓޯ