އީރާނުގެ ނިއުކްލިއަ ޕްރޮގްރާމް ހިންގާ ތިން މަރުކަޒަކަށް ދެވުނީ "ވަގުތީ ގެއްލުމެއް" ކަމަށް އެމެރިކާގެ ދިފާއީ ވުޒާރާ، ޕެންޓެގަންއިން އިއުތިރާފުވެއްޖެއެވެ.

"ހަލާކުތަކެއް ދެވުނު ނަމަވެސް ފަނާކޮށްލެވުމާ ގާތަށް ވެސް ނުދޭ،" ޕެންޓެގަނުން ލީކުވެފައިވާ މެމޯއެއްގައި ބުނެފައިވެއެވެ.

"އޮޕަރޭޝަން ދަންވަރުގެ މަރުތޭލަ" ނުވަތަ "އޮޕަރޭޝަން މިޑްނައިޓް ހެމާ"ގެ ނަމުން ނަން ދީގެން ދިން ހަމަލާތަކުން "ކުރެވުނުހާ ހަމައެކަނި ކަމަކީ އީރާނުން ނިއުކްލިއަ ހަތިޔާރު އުފެއްދުމުގެ މަޝްރޫއު މަދު މަސްތަކެއް ފަހަތަށް ޖައްސައިލެވުން" ކަމަށް ޕެންޓެގަންގެ މަސްދަރުތަކުން ބުންޏެވެ.

އެ އިދާރާއިން ލީކުވި މެމޯގައި ބުނެފައިވަނީ ސެންޓްރިފިއުޖްތަކާއި ފައްކާކޮށްފައިވާ ޔުރެނިއަމް މާއްދާ އީރާނުން ފޮރުވައިފައިވާ "ބިންގަރާސްތަކުގައި ސަލާމަތުން ހުރި ކަމަށް ބެލެވޭ" ކަމަށެވެ.

ޕެންޓެގަންގެ މި ލިޔެކިޔުން ފަޅާއެރުމުގެ ކުރިން ރައީސް ޑޮނަލްޑް ޓްރަމްޕް ވިދާޅުވެފައިވަނީ "އީރާނަށް ދެން ނިއުކްލިއަ ބޮމެއް ހެދޭނީ ވަރަށް ގިނަ ދުވަސް ފަހުން" ކަމަށެވެ.

އެހެންކަމުން ދިރާސާކުރާ ފަރާތްތަކުން މިހާރު ބުނަނީ މިހާ ބޮޑު އުއްމީދެއް ޓްރަމްޕް ގެންގުޅުއްވުން ރަނގަޅު ނޫން ކަމަށެވެ.

އީރާނުން މިހާރު ވަނީ އދ.ގެ އެޓޮމިކް ހަކަތައާ ބެހޭ އިދާރާ، އިންޓަނޭޝަނަލް އެޓޮމިކް އެނަޖީ އެޖެންސީ (އައި.އޭ.އީ.އޭ)އާއެކު އޮތް ގުޅުން މެދުކަނޑައިލައިފައެވެ. އެ އިދާރާއަކީ ނިއުކްލިއަ ހަކަތަ ރައްކާތެރިކަމާއި އަދި ސުލްހަވެރި ބޭނުންތަކަށް ޕްރޮމޯޓު ކުރަން އދ.އިން އުފައްދައިފައިވާ ބައިނަލްއަގުވާމީ އިދާރާއެކެވެ. އަދި ގައުމުތަކުން ނިއުކްލިއަ ހަތިޔާރު އުފެއްދުން ހުއްޓުވުމަށް މަސައްކަތް ކުރާ މުއައްސަސާއެކެވެ. އެ އިދާރާއާއެކު އީރާނުން ވެފައިވާ އެއްބަސްވުމުން އެމެރިކާ އަމިއްލައަށް ނުކުމެގަތީ ޓްރަމްޕްގެ ފުރަތަމަ ރިޔާސީ ދައުރުގައެވެ.