ޣައްޒާ ހަނގުރާމަ ނިމުމަކަށް ގެނައުމަށް ގޮވައިލުމަށް 20 ގައުމާއި ބައިނަލްއަގުވާމީ ޖަމާއަތްތައް ބައިވެރިކޮށްގެން ސްޕެއިންގައި ސަމިޓެއް ބާއްވައިފިއެވެ.
ވެރިރަށް މެޑްރިޑްގައި ސްޕެއިންގެ ހާރިޖިއްޔާގައި އިއްޔެ ބޭއްވި ސަމިޓުގައި ސްޕެއިނުން ގޮވައިލީ ބައިނަލްއަގުވާމީ ފެންވަރުގައި އިސްރާއީލާ ދެކޮޅަށް ދަތިކުރުމުގެ ފިޔަވަޅުތައް އެޅުމަށެވެ. އެއީ ޣައްޒާގައި ބަނޑުހައިހޫނުކަމާއި މީހުން ޝަހީދުވުން ހައްދުފަހަނަޅައިދާތީއެވެ.
"މި ހަނގުރާމަ ހުއްޓުވަން ދަތިކުރުމުގެ ފިޔަވަޅުތައް އިސްރާއީލާ ދެކޮޅަށް އެޅުމާއި އަހަރެމެންނަށް ކުރެވުނު ހުރިހާ ކަމެއް ކުރަން ޖެހޭނެ،" ސްޕެއިންގެ ހާރިޖީ ވަޒީރު ހޯސޭ މެނުއަލް އަލްބަރެސް ވިދާޅުވިއެވެ.
"މެޑްރިޑް ގްރޫޕް"ގެ ނަމުގައި ބޭއްވި ބައްދަލުވުމަކީ އަންނަ މަހު 17 ގައި ފަލަސްތީންގެ މިނިވަން ދައުލަތަކާ ބެހޭ ގޮތުން އދ.އިން ބާއްވާ ޖަލްސާއަށް ތާއީދު ހޯދުމަށް ބޭއްވި ބައްދަލުވުމެކެވެ.
ޣައްޒާއަށް އެހީ ވެއްދުން އިސްރާއީލުން މަނާކޮށްފައި އޮތުމުގެ ސަބަބުން ގާތްގަނޑަކަށް 54،000 އެއްހާ މީހުން ޝަހީދުވެފައިވާތީ ޣައްޒާ ހަނގުރާމަ ނިންމުމުގެ މުހިންމުކަމުގެ މައްޗަށް ހޯސޭ އަލިއަޅުވައިލެއްވިއެވެ.
ދެ މަހަށް ފަހު ޣައްޒާއަށް އެހީ ވެއްދުމަށް އިސްރާއީލުން ހުއްދަ ދިނީ ދާދި މަދު މިންވަރަކަށް ކަމަށް އެހީ ދޭ ޖަމާއަތްތަކުން ބުނެއެވެ.
ޖަރުމަނީ އާއި މިސްރުން ވެސް ވަނީ ޣައްޒާ ހަނގުރާމަ އަވަހަށް ނިންމައިލައި ސިޔާސީ ހައްލެއް ގެނައުމަށް ގޮވައިލައިފައެވެ.
ފަލަސްތީންގެ މިނިވަން ދައުލަތެއް ގާއިމުކުރަން ބައިނަލްއަގުވާމީ މުޖުތަމައުން ކުރަމުން އަންނަ މަސައްކަތަށް މިހާރު އަންނަނީ އާ ހިތްވަރެއް ލިބެމުންނެވެ.
advertisment
