މަތިންދާބޯޓުގައިވާ އެންމެ ބޭނުންތެރި އެކައްޗަކީ ފްލައިޓް ޑޭޓާ ރެކޯޑަރ (އެފް.ޑީ.އާރް) އަދި ކޮކްޕިޓް ވޮއިސް ރެކޯޑަރ (ސީ.ވީ.އާރް) އެވެ. އާއްމުކޮށް ކިޔައި ގޮތުން ނަމަ "ބްލެކް ބޮކްސް"އެވެ. ލަފުޒީ މާނައިން "ކަޅުފޮށި" މިއީ އުދުހުންތަކާ ބެހޭ ސިނާއަތުގެ ސަލާމަތްތެރިކަމުގައި މުހިންމު ދައުރެއް އަދާކުރާ އާލާތެކެވެ.
ފްލައިޓަކާ ބެހޭ މުހިންމު މައުލޫމާތު ރެކޯޑު ކުރެވޭ ގޮތަށް ފަރުމާކޮށް، ހަދައިފައިވާ ކަޅުފޮށިން، އެ ފްލައިޓަކަށް ދިމާވެދާނެ ހާދިސާއެއް ނުވަތަ ކާރިސާއެއް ހިނގި ގޮތުގެ މައުލޫމާތު ތަހުގީގަށް ލިއްބައިދޭ އެންމެ މުހިންމު އެއް ވަސީލަތަކީ އެ ފްލައިޓެއްގެ ކަޅުފޮއްޓެވެ.
މި ބަލައިލަނީ މި ދެ ބާވަތުގެ ކަޅުފޮށީގެ ސިފަތަކަށެވެ.
1. ފްލައިޓް ޑޭޓާ ރެކޯޑަރ (އެފް.ޑީ.އާރް):
އެފް.ޑީ.އާރް.އިން ބަލައި ކަންތައްތަކުގެ ތެރޭގައި ފްލައިޓް އުދުހޭ އުސްމިނާއި ދަތުރުކުރާ ދުވެލީގެ ބާރުމިނާއި، ފްލައިޓް ދާ މިސްރާބާއި، އިންޖީނު މަސައްކަތްކުރާ މިންވަރާއި، ފްލައިޓް ހިންގުމަށް ދޭ ކޮންޓްރޯލްތަކާ ބެހޭ މައުލޫމާތު ހިމެނެއެވެ.
އަދި އުޅަނދުގެ އެކި ހިސާބުތަކުގައި ހަރުކޮށްފައިވާ ސެންސާތަކުން ދެނެގަންނަ މައުލޫމާތު ވެސް ހިމެނެއެވެ. މިއީ ފްލައިޓެއް އޮޕަރޭޓްކުރުމުގެ ހުރިހާ ކަމެއްގެ ތަފުސީލު ލިއްބައިދޭ މައުލޫމާތެވެ. މިއީ ހާދިސާއެއް ނުވަތަ ކާރިސާއެއް އުޅަނދަށް ކުރިމަތިވެއްޖެ ނަމަ އެ ކަން ހިނގައިދިޔުމަށް މެދުވެރިވި މަރުހަލާތައް ބެލޭ ގޮތެވެ. ސަބަބަކީ އުޅަނދު މަސައްކަތްކުރާ ގޮތުގައި މައްސަލައެއް އުޅޭ ނަމަ މި މައުލޫމާތު ދެނެގަންނަ އާލާތަކީ ވެސް އެފް.ޑީ.އާރް.އެވެ.
2. ކޮކްޕިޓް ވޮއިސް ރެކޯޑަރ (ސީ.ވީ.އާރް):
ސީ.ވީ.އާރް.އަކީ ޕައިލެޓުން ތިބޭ ކޮކްޕިޓްގެ ތެރޭގައިވާ އަޑުތައް ރެކޯޑްކުރާ އާލާތެކެވެ. އެ ގޮތުން ފަޅުވެރިންގެ ދޭތެރޭގައި ދެކެވޭ ވާހަކަތަކާއި އެއާޕޯޓްތަކުގައި ހުންނަ އެއާ ޓްރެފިކް ކޮންޓްރޯލް ޓަވަރުތަކުގެ ޓެކްނީޝަނުންނާ ރޭޑިއޯ މެދުވެރިކޮށް ދެކެވޭ ވާހަކަތައް ހިމެނެއެވެ.
ސީ.ވީ.އާރް.އިން ފްލައިޓާ ގުޅޭ އެހެން އަޑުތައް ވެސް ރެކޯޑްކުރެއެވެ. އޭގެ ތެރޭގައި އަލާމް އެޅުމާއި އިންޖީނުގެ އަޑުތައް ހިމެނެއެވެ.
މި ގޮތަށް ފްލައިޓާ ގުޅޭ ހުރިހާ އަޑެއް ރެކޯޑް ކުރެވުމުން، ފަޅުވެރިންގެ އަމަލުތައް ހުރި ގޮތާއި، އެ މީހުން ނިންމި ނިންމުންތަކާއި، އެ މީހުންގެ ދޭތެރޭގައި މުއާމަލާތާއި އަމަލުތައް ކުރެވުނު ގޮތްތައް، ތަހުގީގު ހިންގައި ފަރާތްތަކަށް އެނގިގެންދެއެވެ. މިއީ ފްލައިޓަކަށް ކުރިމަތިވެދާނެ ހާދިސާއެއް ނުވަތަ ކާރިސާއެއްގައި ކަން ހިނގި ގޮތް ދެނެގަތުމަށް ކޮންމެހެން މުހިންމު މައުލޫމާތުތަކެވެ.
މި ދެ ބާވަތުގެ ކަޅުފޮއްޓަކީ ވަރަށް ނާޒުކު ހާލަތްތަކުގައި ވެސް ރައްކާތެރިކުރެވިފައިވާ ގޮތަށް ހަދައިފައިވާ ދެ އެއްޗެވެ. އެ ގޮތުން ތަނެއްގައި އާދަޔާ ހިލާފަށް ބާރުކޮށް ޖެހުމާއި ވަރުގަދަ އަލިފާންގަނޑުން ވެސް އެއްވެސް ކަހަލަ އަސަރެއް ނުކުރެއެވެ. ނަތީޖާއަކީ މަތިންދާބޯޓު ވެއްޓި، ސުންނާފަތިވުމުން ވެސް، މި ދެ ކަޅު ފޮށި ހުންނާނީ ރައްކާތެރިކޮށެވެ. އޭގައިވާ އެއްވެސް މައުލޫމާތެއް ވެސް ނުގެއްލިއެވެ.
މި ދެ ކަޅު ފޮށި އާއްމު ގޮތެއްގައި ބަހައްޓައިފައި ހުންނަނީ މަތިންދާބޯޓެއްގެ ފަހަތު ބައިގައެވެ. ސަބަބަކީ އުޅަނދަށް ކުރިމަތިވާ އެކްސިޑެންޓެއްގައި ވެސް ގެއްލުމެއް ނުލިބުން އެންމެ އެކަށީގެންވަނީ ފަހަތު ބަޔަށް ކަމަށްވާތީއެވެ.
އެހެންކަމުން، މަތިންދާބޯޓުގައި ހުންނަ ދެ ކަޅު ފޮއްޓަކީ އުދުހުންތަކާ ބެހޭ ސިނާއަތުގެ ރައްކާތެރިކަން ދެމެހެއްޓުމަށް ކޮންމެހެން މުހިންމު ދެ އާލާތެވެ. އޭގައި ރައްކާކުރެވޭ މައުލޫމާތު ދިރާސާކުރުމުން، ފްލައިޓަށް ދިމާވާ އެކްސިޑެންޓްތައް ހިނގަން ދިމާވި ސަބަބުތައް ދެނެގަނެވި، ކުރިމަގުގައި ރައްކާތެރިކަމުގެ ފިޔަވަޅުތައް އަޅަން އެހީއަކަށްވެއެވެ.
މަތިންދާބޯޓުފަހަރުގައި ހުންނަ ދެ ކަޅު ފޮށީގެ ސަބަބުން އެވިއޭޝަން އިންޑަސްޓްރީގެ ސަލާމަތްތެރިކަމަށް އަޅާނެ އާ ޕްރޮޓޮކޯލްތަކާއި ފިޔަވަޅުތައް އެނގިގެންދެއެވެ. އެއީ ކުރިމަގުގައި ހިނގައިފާނެ ހާދިސާއަކުން ރައްކާތެރިވުމަށާއި އެ ފަދަ ހާދިސާތައް ހިނގުމަށް މެދުވެރިވެދާނެ ކަންތައްތަކަށް ކުރީބައިގައި ފިޔަވަޅު އެޅުމަށެވެ.
މިހެންވެ، މި ދެ ކަޅު ފޮށީގެ ސަބަބުން އުދުހުމުގެ ސިނާއަތާ ގުޅޭ ރައްކާތެރިކަމުގެ ފިޔަވަޅުތަކަށް ވަނީ ކުރިއެރުން ލިބިފައެވެ. އެހެނީ މި ދެ އާލާތުން ލިބޭ މައުލޫމާތުގެ އަލީގައި އުދުހޭ އުޅަނދުފަހަރު ފަރުމާކުރެވެމުން އަންނަ ގޮތާއި ފްލައިޓްތައް އޮޕަރޭޓްކުރާ ގޮތްތަކަށް ދާއިމީ ގޮތެއްގައި އަންނަނީ އިސްލާހީ ފިޔަވަޅުތަކާއި ކުރިއެރުންތައް ގެންނަމުންނެވެ.
advertisment
