ބަސް އަހާށޭ އަޑު އަހާށޭ ލޯބިވާ ކުޑަ ދަރިފުޅާ
ދަސްކުރާށޭ ރީތި ޚުލުޤާ އަދަބުވެރިކަން ދަރިފުޅާ
މަދަރުސާޔާ ގޭތެރޭގައި ލިބިދެވޭ ތަރުބިއްޔަތާ
ބަދަލުވާނޭ އެއްކަމެއްވެސް ލިބިނުގަންނަނި ދަރިފުޅާ
މަންމަޔާ ބައްޕަގެ އުފަލަކީ މޮޅުވުމޭ ދަރިފުޅު ނިކަން
ފަންނުތަކަށާ ޢިލްމުގައިވެސް ކުރިއަރައިގޮސް ދަރިފުޅާ
އަދަބުސަދަބާ ރީތިބަސްމަގު ދަސްކުރަންވާނޭ މޮޅަށް
ޤަދަރުވެރި މޮޅު ދަރަޖަވެރި މީހުންތެރޭންވާން ދަރިފުޅާ
އަޅި ބުރާނޭ ކަނބުރުގެޔަކަށް ވަދެއުޅޭ މީހުން ގަޔަށް
މަޅިމަޅީގައި ބެދި އަބުރު ގެއްލުނަ ނުދެއްޗޭ ދަރިފުޅާ
އަތަރު ވިއްކާ މީހަކާއެކު އެކުއުޅޭނަމަ މީރުވަސް
ހަތަރު ދަމުވެސް ހެދުމުގައި ހުންނާނެޔޭ ކުޑަ ދަރިފުޅާ
އެކުއުޅެންވާނީ ތިމާޔަށްވުރެ ދޮށީ ހެޔޮ މީހުނާއެކު
އެކުއެޅޭނަމަ ހަގު ކުދިންނާ، ބުއްދި އުނިވޭ ދަރިފުޅާ
މިތުރަކަށް ނުހިފާށެ އުޅުމުގެ ހެޔޮލަފާނޫން އެކަކުވެސް
މިތުރު ގޯސްނަމަ ގޯސްމަގަށް ދަރިފުޅު ހިނގައިދޭ ދަރިފުޅާ
ގޭ ވެށިންނާ އަދި ސުކޫލުން ދަސްނުވާ ގޯސް އާދަތައް
ފޭވެވެން އުނދަގޫ މިތުރު ކިބައިން ލިބޭނޭ ދަރިފުޅާ
ވަކިވެގެން ހަށްޓާ ފުރާނަ ނުގޮސް ހުރީވިއްޔާ އަބަދު
ވަކިނުވާނަމެ ހެޔޮ ދުޢާ ކުރުމާ މިދަރިޔަށް ދަރިފުޅާ
