އެސް.ޓީ.އޯ.ގެ މި އަހަރުގެ ތިންވަނަ ކުއާޓަރުގައި 3.6 ބިލިއަން ރުފިޔާގެ ޖުމްލަ އާމްދަނީއެއް ލިބިއްޖެ ކަމަށް އެ ކުންފުނިން މިއަދު ހާމަކޮށްފިއެވެ. މިއީ މީގެ ކުރީ ކުއާޓަރާ އަޅާބަލާއިރު ތިން ޕަސެންޓްގެ ކުރިއެރުމެކެވެ.

"ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ ކުންފުނިން ކުރަމުންގެންދާ ވިޔަފާރި ރަނގަޅުވެފައިވުން،" އެސް.ޓީ.އޯ.އިން ނެރުނު ބަޔާނެއްގައި ބުންޏެވެ.

އާމްދަނީ އިތުރުވުމާއެކު އެސް.ޓީ.އޯ.އަށް ޖުމްލަ ފައިދާގެ ގޮތުގައިވަނީ 592 މިލިއަން ރުފިޔާ ލިބިފައެވެ. މިއީ މީގެ ކުރީ ކުއާޓަރާ އަޅާބަލާއިރު 15 ޕަސެންޓްގެ ކުރިއެރުމެކެވެ.

އެސް.ޓީ.އޯ.ގެ ޕްރޮވިޝަންސް އިތުރުވުމާއެކު ކުންފުނީގެ ހަރަދު އިތުރުވީ ނަމަވެސް ކުންފުނީގެ ޖުމްލަ ފައިދާ އިތުރުވުމާއެކު މި ކުއާޓަރުގެ ހިންގުމުގެ ފައިދާގެ ގޮތުގައި ވަނީ 251 މިލިއަން ރުފިޔާ ލިބިފައެވެ. މިއީ މީގެ ކުރީ ކުއާޓަރާ އަޅާބަލާއިރު 23 ޕަސެންޓްގެ ކުރިއެރުމެކެވެ.

ޓެކްސްއަށް ކެނޑުމުގެ ކުރިން މި ކުއާޓަރުގެ ސާފު ފައިދާއަކީ 198 މިލިއަން ރުފިޔާކަމަށް އެސް.ޓީ.އޯ.އިން ބުންޏެވެ. މިއީ މީގެ ކުރީ ކުއާޓަރާ އަޅާބަލާއިރު 12 ޕަސެންޓްގެ ކުރިއެރުމެކެވެ.

"މީގެ މައިގަނޑު ސަބަބަކީ ކުންފުނިން ކުރަމުން އަންނަ ވިޔަފާރިތައް ރަނގަޅުކުރެވި، ޖުމްލަ ފައިދާ އިތުރުވެފައިވުން،" އެސް.ޓީ.އޯ.އިން ބުންޏެވެ. އެ ގޮތުން ޓެކުހަށް ކެނޑުމަށް ފަހު މި ކުއާޓަރުގެ ސާފު ފައިދާގެ ގޮތުގައި ވަނީ 156 މިލިއަން ރުފިޔާ ލިބިފައެވެ.

"މި ފުރުޞަތުގައި އެސްޓީއޯގެ ވިޔަފާރީގެ އެންމެހާ ބައިވެރިން އެސްޓީއޯގެ ކަންކަމާމެދު ބަހައްޓަވާ ގާތްކަމާއި ދެއްވާ އެހީތެރިކަމާއި އެއްބާރުލުމަށް، ނިހާޔަތައް ޝުކުރު ދަންނަވަން،" އެސް.ޓީ.އޯ.ގެ ބަޔާނުގައި ބުންޏެވެ.