ސްޓެލްކޯގެ ސްލޯގަން އަކީ "ތަރައްޤީގެ ބައިވެރިޔާ" ކަމަށް ނިންމައި، އެކަން އިޢުލާނުކޮށްފިއެވެ.

ސްޓެލްކޯގެ ޚިދުމަތަށް މި އަހަރުގެ ޑިސެންބަރު މަހު 75 އަހަރު ފުރޭއިރު، ފުރަތަމަ ފަހަރަށް ބޭނުންކުރާ މި ސްލޯގަން އިފްތިތާޙުކޮށްދެއްވީ އެ ކުންފުނީގެ މެނޭޖިން ޑިރެކްޓަރ ޙުސައިން ފަހުމީއެވެ.

ސްޓެލްކޯ އިން ބުނީ މި ސްލޯގަންއިން ރަމްޒުކޮށްދެނީ "1949 ވަނަ އަހަރު ރާއްޖޭގައި ކަރަންޓުގެ ޚިދުމަތް ފެށިގެން މި ވޭތުވެދިޔަ މުއްދަތުގައި ޤައުމީ ތަރައްޤީގައި ސްޓެލްކޯއިން ވެފައިވާ ޙިއްސާ" ކަމަށެވެ. އެގޮތުން ޤައުމީ ތަރައްޤީގެ ދުވެލި ހަލުވިވެގެން ދިއުމުގައި ކަރަންޓުގެ ސިނާއަތާއި އެ ސިނާއަތުގައި ޚިދުމަތްދޭން އޮތް ކުންފުނީގެ ހައިސިއްޔަތުން ސްޓެލްކޯގެ ދައުރު މި ސްލޯގަންއިން ރަމްޒުކޮށްދޭ ކަމަށް ސްޓެލްކޯ އިން ބުނެއެވެ.

"އަދި ހަމަ މިއާ އެކު 1949ން ފެށިގެން ސްޓެލްކޯއިން (އެކި ނަންނަމުގައި) ދެމުންއައި ކަރަންޓުގެ ޚިދުމަތުގެ އިތުރުން މިހާރު މި ކުންފުނިން ދެމުންދާ ފެނާއި، ނަރުދަމާގެ ޚިދުމަތާއެކު ޤައުމީ ތަރައްޤީގައި ކުންފުނީގެ ހިއްސާ އިތުރުވެގެން ގޮސްފައިވާ ވުން ވެސް މި ސްލޯގަންއިން ރަމްޒުކޮށްދޭ،" ސްޓެލްކޯ އިން ބުނެއެވެ.