އެމެރިކާގެ ޔުނައިޓެޑް އެއާލައިންސް ކޮޅިގަނޑެއްގައި ޖެހި މަދުވެގެން ހަ މީހުން ޒަހަމްވުމުން ޓެނެސީ ސްޓޭޓްގެ މެމްފިސް ބައިނަލްއަގުވާމީ އެއާޕޯޓަށް ކުއްލި ހާލަތުގައި ޖައްސައިފިއެވެ.

ބޮއިންގް 737 މަރުކާގެ ފްލައިޓް 1196 ދަތުރުކުރަމުންދިޔައީ މެކްސިކޯގެ ކެންކުން ސިޓީން އެމެރިކާގެ އިލިނޮއި ސްޓޭޓްގެ ޝިކާގޯ ސިޓީއަށެވެ.

ކޮޅިގަނޑުގައި ޖެހުނީ އެމެރިކާގެ ލުއިސިއާނާ ސްޓޭޓްގެ ނިއު އޯލިއަންސް ސިޓީގެ މަތިން ދަތުރުކޮށްފައި ދަނިކޮށެވެ.

"ފްލައިޓްގައި މުޅިއެކު 179 މީހުން ހިމެނޭ،" މެމްފިސްގެ އަލިފާން ނިއްވާ އިދާރާގެ އޮފިޝަލަކު ވިދާޅުވިއެވެ.

ސަލާމަތާއެކު މެމްފިސް އެއާޕޯޓަށް ޖެއްސީ އެމެރިކާއަށް ބުދަ ދުވަހު (ރާއްޖެއަށް މިއަދު) މެމްފިސް ގަޑިން މެންދުރު ފަހު 2:50 ގައެވެ.

އެ އިދާރާއިން ބުނީ އެކަކަށް ފަރުވާ ދޭން ހޮސްޕިޓަލަށް ގެންދަންޖެހުނު ކަމަށެވެ. ނަމަވެސް އޭނާގެ ހާލު ސީރިއަސް ނޫން ކަމަށްވެއެވެ.

ދެން ޒަހަމްވި މީހުންނަށް ޒަހަމްވީ ކުޑަކޮށް ކަމަށާއި އެ މީހުން ހޮސްޕިޓަލަށް ދާން ބޭނުން ނުވާ ކަމަށް ބުނި ކަމަށް އެ އިދާރާއިން ބުންޏެވެ.

"ކޮޅިގަނޑުގައި ޖެހުނު ވަގުތު ސީޓުގެ ބެލްޓް އަޅުވާ ނިޝާން ދިއްލައިފައި ހުރީ،" އެއާލައިނުން ބުންޏެވެ.

މި ކުއްލި ހާލަތުގައި ފްލައިޓްގެ ފަޅުވެރިން ފަސިންޖަރުން ރައްކާތެރިކުރުމަށް އެޅި ފިޔަވަޅުތަކަށް އެއާލައިނުން ތައުރީފުކުރިއެވެ.

"އަހަރެމެންގެ މުވައްޒަފުންނާއި ކަސްޓަމަރުންގެ ސަލާމަތަށް ފަޅުވެރިން އެޅި ފިޔަވަޅުތަކަށް ޝުކުރުވެރިވަން،" އެއާލައިނުން ބުންޏެވެ.

އެއާލައިނުން ބުނީ ފްލައިޓް ޝިކާގޯއަށް އަވަހަށް ނައްޓާލާނެ ކަމަށް އުއްމީދުކުރެވޭ ކަމަށެވެ.

އެމެރިކާގެ ދަތުރުފަތުރާ ބެހޭ އިދާރާގެ ދަށުން ހިންގާ ފެޑެރަލް އެވިއޭޝަން އެޑްމިނިސްޓްރޭޝަން (އެފް.އޭ.އޭ)އިން ބުނީ މި ހާދިސާ ތަހުގީގުކުރާނެ ކަމަށެވެ.

"ލުއިސިއާނާ މަތިން ބާރު ކޮޅިގަނޑެއްގައި ޖެހިގެން ފަޅުވެރިން ރިޕޯޓް ކުރުމުން ޔުނައިޓެޑް އެއާލައިންސް ފްލައިޓް 1196 ވަނީ މެމްފިސްގެ ބައިނަލްއަގުވާމީ އެއާޕޯޓަށް ރައްކާތެރިކަމާއެކު ޖައްސައިފައި. އެފް.އޭ.އޭ.އިން މި ހާދިސާ ތަހުގީގު ކުރާނަން،" އެފް.އޭ.އޭ.އިން ނެރުނު ބަޔާނެއްގައި ބުންޏެވެ.

މި ހާދިސާއިން ހާމަވީ ވައިގެ މަގުން ދަތުރުކުރުމުގައި ހުރި ނުރައްކާތައް ކަމަށާއި ކޮޅިގަނޑެއްގައި ޖެހުމުން އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމުގެ މުހިންމުކަން ކަމަށް އޮފިޝަލުން ވިދާޅުވިއެވެ.