ސަލާމަތް ކަންމަތީ ދަރިފުޅު އަބަދު އުފަލުން ވުމޭ އެދެނީ
ފަލާޙާ ކާމިޔާބު ތަކުން ޙަޔާތް ރޯޝަން ވުމޭ އެދެނީ
ޙަސަދަޔާ ފިތުނަޔާ ކެހިވެރި ކަމުގެ ރޭވުން ތަކުން ދިނިގެން
ޙަސަބު ނަސަބާ އަބުރު ރައްކައު ވެވޭނޭ ގޮތް ވުމޭ އެދެނީ
ޖަމާޢަތުގައި އުޅޭ އެންމެން ދުރުން އައިސްގޮސް އުޅޭ އެންމެން
ސަމާސާކޮށް ނިކަން ލޯބިން ހިތުން ރުހިގެން ވުމޭ އެދެނީ
ސުކޫލުގެ ދަރިވަރުންގެ ތެރޭން އަރައިހުރި މޮޅުވި ދަރިވަރަކަށް
ސުކޫލުގެ ރަން ވަނައިގެ ތެރޭން މި ދަރިފުޅު ލެއްވުމޭ އެދެނީ
ޒަމާނީ އެކި ނުބައި ފިކުރާ ނުބައިވި ޚިޔާލުތައް ދޫކޮށް
އަމާންކަމުގައި ނިކަން އުފަލުން މިދުނިޔޭގައި ވުމޭ އެދެނީ
ރިވެތި ޚުލުޤުން ޖަރީވެވިގެން ރިވެތި އުޅުމެއް ނިކަން ލިބިގެން
ރިވެތި ނަން ނަން ލިބޭނެ ގޮތަށް މިދަރިފުޅު ލެއްވުމޭ އެދެނީ
އުޅެން އޮތް މާތްވި އިސްލާމް ދީން މަތީ ސާބިތުވެ ހުރުމާއެކު
ކުޅެން އުޅެވޭ ވަޤުތުތަކުވެސް ނަމާދު އަދާ ވުމޭ އެދެނީ
ރަނގަޅުނޫން އެކުވެރިން ލިބުމުގެ ނުބައި ސުންޕާކަމުން ދުރުވެވި
ރަނގަޅު ސޯލިހު ލަފާ މިތުރުން ޚިޔާރު ވެގެން ވުމޭ އެދެނީ
