މީގެ 58 އަހަރު ކުރިން ގދ. ހަވަރު ތިނަދޫ މީހުން ރަށުން ބާާލައި، ރަށް ފަޅުކުރި ޙާދިސާ ދައްކައިދޭ ކުރެހުމާއި ފޮޓޯ މައުރަޒެއް ތިނަދޫގައި ބާއްވަން ހަމަޖައްސައިފި އެވެ.
ތިނަދޫ ސްޓޭޑިއަމްގެ ފަރާތުން މި މައުރަޒު ހުޅުވުމަށް ހަމަޖެހިފައި ވަނީ މި މަހުގެ 22 ވަނަ ދުވަހެވެ. އެއީ 1966 ގައި ތިނަދޫގައި އަލުން އާބާދުވާން ފެށިތާ 54 އަހަރު ފުރޭ ދުވަހެވެ.
ތިނަދޫ ސްޓޭޑިއަމްގެ ފަރާތުން އިއްޔެ އިޢުލާންކުރި ގޮތުގައި މައުރަޒުގައި ބައިވެރިވުމުގެ ފުރުސަތު ހުޅުވާލާފައި ވަނީ ދެ އުމުރުފުރާއަކަށެވެ. އެއީ 16 އަހަރުން ދަށާއި 16 އަހަރުން މައްޗަށެވެ.
ތިނަދޫ ސްޓޭޑިއަމުން މައުލޫމާތު ދިން ގޮތުގައި މައުރަޒު ކުރިޔަށް ދާނީ ފޮޓޯ އަދި އަތުކުރެހުން މި ދެ ބަޔަކަށް ބަހާލައިގެންނެވެ. އެގޮތުން ފޮޓޯތައް ވާންވާނީ 1962 ވަނަ އަހަރު މި ރަށުން މީހުން ބޭލި ހާދިސާއާ އެއްގޮތަށް ތައްޔާރުކުރެވި އަލުން ނަގާފައިވާ ފޮޓޯ އަށް ކަމަށާއި ބައިވެރިކުރާ ކުރެހުންތައްވެސް ވާންވާނީ އެ ޙާދިސާ އާ އެއްގޮތް ކުރެހުމަކަށެވެ.
މި މައުރަޒުގައި ބައިވެރިވާ ފަރާތްތަކުން ކުރެހުމާއި ފޮޓޯ ޙަވާލު ކުރަން ހަމަޖެހިފައިވާ އެންމެ ފަހު ދުވަހަކީ މި ހިނގާ އޮގަސްޓް މަހުގެ 20 އެވެ.