އިޙުޞާސްނުވޭ މިނިވަންކަމެއް ސައްބީސްޖުލާ ފަހެ އައުމަކުން
ވިހުރޭ ދިދައިގެ ހިޔާ ދަށުން ފަލަވާ ބިދޭސީން ގިނަކަމުން

ވިޔަފާރިވެސް މިނިވަން ވެގެން ދިވެހީން އެކަންކޮށް އުޅެނިކޮށް
ކިޔަމަންނުވާ ބަޔަކުމެ މިތާ ވިޔަފާރި ހުރިހައި ފެށިފަހުން

ކަނޑުފަޅު، އަތޮޅު، ގިރި، ހާހަލާ، ސިއްރެއްގެ ގޮތުގައި އޮތް ޒަމާން
ފަނޑުކޮށް ލުމަށްފަހުގައި ބިދޭސީން ލޯ އެއަށް ހުޅުވައި ލުމުން

ރަށްރަށުގެ ވަލުގައި ހުންނަހައި ފާލައްބަ، ހިންނަ، ތަކާއެކީ
ރަށްރަށްއެކަށް ހިތުދަސްކުރަން އެވެރިން މިތާ ފެތުރުނު ފަހުން

ހަލަކަށް އެމެއް ހިފުމަށް އެރޭން ޖެހުނަސް ބިދޭސީން ޚާއްޞަވެވި
ދަލަކަށް އެމެއް އެރިޔަސް އެނގޭ ބަޔަކަށް ބިދޭސީން ވީފަހުން

ރައިވެރިކަމާ މަސްވެރިކަމާ ދަނޑުވެރިކަމާ ގޮސް އަތްދޮށުން
ގައިމުވެ ބިދޭސީން އެކަމުގައި ރަށްރަށު ބަނޑަހަތައް ޖެހިފަހުން

ބެންކުން ޑޮލަރު ނެތުމުން ލިބޭން ދިވެހީން އެއަށް ގޮތްހުސްވިޔަސް
ބެންކަށް ވުރެން މުއްސަނދި ބައެއް ކަމުގައި ބިދޭސީން ވީކަމުން

ބޭނުންވިޔަސް ކުރުމަށް ކަމެއް ގެދޮރުގެ މަރާމާތުގެ ތެރޭން
ރޭނުން، ވަޑާންފަދަ ކަންކަމުން ދިވެހީން ދުރަށް ފައްސައިލުމުން

ފަޅުއޮޑިޔަކުން ބާލާ މުދާ، ކާއްޓާ ދަރާ ފަތްކެޔޮކޮޅާ
ދަޅު، ޑަބިޔަލާ، މުޅިޔާ، ކުކުޅު، ގަތުމަށް ބިދޭސީން ވެރިވުމުން

ކުރުމަށް ރިސޯޓުގެ ސަޕްލަޔާ ވިޔަފާރި ކުދި ލައިގެން މުށަށް
ފުރުޞަތު ނުދީ ދިވެހިން ދުރަށް ލާފައި ބިދޭސީން ގަދަވުމުން