ކޮންމެ ޚަލްޤު ކުރެއްވުމެއްގައި ކަށަވަރުވި ﷲ މާތް
ކޮންމެ ވީހައި ކަންކަމެއްގައި ކަށަވަރުވި ﷲ މާތް
މީސްތަކުންގެ ބަފައިކަލުން އާދަމުގެފާނު އުހެއްދެވުން
މީސްތަކުން އުފެދޭ މި "ނުޠުފާ" ކަށަވަރުވި ﷲ މާތް
ކާފިރުން މިބިމުން މުޅިން ފޮއްސެވި ދުޢާފުޅު ނޫޙުމާތް
ކާފިރުން މައްޗަށް ޖެހުނު ހިނދު ކަށަވަރުވި ﷲ މާތް
ލެއްވެވުނު ހިނދު، މާތް ޚަލީލު اللهِ ގަދަ އަލިފާންގަނޑަށް
ދެއްކެވުނު ބޮޑު މުޢުޖިޒާތުން ކަށަވަރުވި ﷲ މާތް
މަހުބަނޑަށް ޔޫނުސުގެފާނުން ލެއްވުމަށްފަހުގައި ނަޖާވުން
އަހުރެމެންނަށް މުޢުޖިޒާތުން ކަށަވަރުވި ﷲ މާތް
ފާސިޤުން ފާޙިޝް ސަދޫމުގެ ދޮގު ކުރީމާ ލޫޠު މާތް
ފާސިދުންނަށް އައި ޢަޛާބުން ކަށަވަރުވި ﷲ މާތް
ކަނޑު ފަޅުއްވައި ލެއްވުމުން މޫސާގެފާނު އަސާކޮޅުން
ކަނޑު ޣަރަޤު ފިރުޢައުނު ވީހިނދު ކަށަވަރުވި ﷲ މާތް
މާތްނަބީ އައްޔޫބު އާލާސްކަންފުޅަށް ކެތްތެރި ވިގޮތް
މާތް ޝިފާގެ ޢަޖާއިބުން ކަށަވަރުވި ﷲ މާތް
ލެއްވުމަަށްފަހު ފުން ވަޅާއި ޖަލަށް ބަނީ ޔޫސުފު ވިމާތް
ދެއްވި، މިޞްރު ޢަޒީޒުކަން ފަހެ، ކަށަވަރުވި ﷲ މާތް
ޢީސަބުނު މަރްޔަމު އުފުއްލެ ވުމުން އުޑަށް ނަޞްރާ އެކީ
މީޞަޙީޙުކަމެއް އެނގެން އޮތް ކަށަވަރުވި ﷲ މާތް
ކައު މުޙައްމަދު މާތް ނަބިއްޔާ ހަނދު އިރުއްވެވި މުޢުޖިޒާތް
ކައުނުގައި މިޢުރާޖު ކުރެވުން ކަށަވަރުވި ﷲ މާތް
ގަސްހިނގާފައި އޭގެފައި ނެތި މޫތަކުން އައިސް އަރިހުގައި
ފަސްނުޖެހި ދެންނެވި ބަހުން ހެކި ކަށަވަރުވި ﷲ މާތް
