ބަދުރުގައި ދެއްވި ނަޞްރުން ޢިބްރަތާ ދަރުސާ ލިބެން ވާނޭ
ބަދުރު ހަނގުރާމަ ޚާއްޞަވެވޭ ސަބަބުތައް ދަސްކުރަން ވާނޭ
އައުސްވަންހައިގެ ސާހިބު ސަޢުދު އަދި މިޤްދާދު ބުުނު އަސްވަދު
ވަޢުދުފުޅުގައިވި ޢަޒުމުފުޅުން ގައިން ހީބިހި ނަގަން ވާނޭ
އުފާފުޅު ވީވަރުން ކީރިތި ނަބިއްޔާ މޫނުފުޅު އަލިވީ
އުފާފުޅުގައި އެ މުޅި ލަސްކަރު ކަރުނަ ފޮދު އޮހޮރިފައި ވާނޭ
ނުހަނު ނިކަމެތި ގޮތެއްގައިވީ ކަމަކު ބިޔަ ލަސްކަރެއް ބަލިކޮށް
އުހައުވެރި ކަމުގެ ދިދަ ދީނުގެ އުފުއްލެވި ގޮތް އެނގެން ވާނޭ
ޢަދަދު ހާހެއްގެ ބިޔަ ލަސްކަރު ބަދުރުގައި ހާވިޔާ ވުމުގައި
މަދަދު މަލަކުންގެ ފައުޖު ތަކުން ވެދެއްވި ހަނދާން ކުރަން ވާނޭ
ރަބީޢަތު، ޝައިބަތާ، ޢަތަބަތު، ޤަތުލުވީ ހިނދު އެ މައިދާނަށް
ޤަބީލާ ދިދަ ބިމަށް ވެއްޓުނު ގޮތަށް ނަޒަރެއް ކުރަން ވާނޭ
ޤަތުލުވީ ކާފަރުން ހަތްދިހަ، ޢަސީރުވި ޢަދަދު ވެސް ހަމަހަމަ
ޤަތުލުވީ ހިނދު އަބޫޖަހުލުގެ ބޮޑާކަން ވެސް އިތުރު ވާނޭ
އުމައްޔަތު ބުނު ޚަލަފު ފަދަ އިސް، ބޮޑުން އެވެރިންގެ ނެތި ދިޔުމުން
ދުމަށް އެއުރެންގެ ފޮނި ބަސްތައް އަރައި ދިޔަކަން އެނގެން ވާނޭ
ޝަހީދުވި ސާދަ ޝުހަދާއުން އުފާވެރިކަންމަތީ ވާކަން
ވަޙީގެ ވަސީލަތުން މަތިވެރި ބިޝާރަތު ދެއްވިގެން ވާނޭ
މިފަދަ މަތިވެރި ހަނދާން އާކޮށް، އެއިން ޢިބްރަތް ނިކަން ލިބިގެން
މިފަދަ މަތިވެރިވި ޢިއްޒަތްތެރި ޝަރަފް ދީނަށް އެދެން ވާނޭ