ތިރީގައި މިވަނީ މީހުން ބުނެފައިވާ، ރަމަޟާން މަހާ ގުޅޭ ބައެއް ވާހަކަތަކެވެ. 

1. ތިމާގެ ހިތުގައި ވިންދުޖަހާހާ ހިނދަކު، ދުނިޔޭގައި ތިމާ ދިރިހުރުމުގެ މަގުސަދެއް އޮތްކަން ހަނދާންކުރާށެވެ! މީހުން ދިރުއްވައި ބޭތިއްބުމާއި މަރުއްވައި ގެންދިޔުމަކީ، މާތްﷲގެ އިރާދަފުޅު އެކަންކަން އެ ގޮތަށް ހަމަޖެހިފައި އޮތުމުންވާ ކަންކަމެވެ. ފަހަރެއްގައި ވެސް، އެކަންކަމީ އެއްވެސް، ބޭނުމެއް، މަގުސަދެއް ނެތި، ހަމަޖެހިފައި އޮންނަ ކަންކަމެއް ނޫނެވެ. ދުނިޔޭގައި އެ މީހެއްގެ ބޭނުން ނެތިއްޖެ ނަމަ، ނޫނީ ދުނިޔޭގައި އޭނާ ނެތުމަކީ އެކަމުން ކަންތައްތަކެއް ހާސިލުކުރެވި، އެންމެ ރަނގަޅު ގޮތް ކަމަށް ވެއްޖެ ނަމަ، އެ މީހަކު މަރުއްވައި، އެކަލާނގެ އެ މީހަކު ގެންދަވައެވެ. އެހެންވީމާ، ތިމާގެ ހިތުގައި ވިންދުޖަހައި ތިމާ ދިރިހުރިހުރުން އަންގައިދެނީ ދުނިޔޭގައި ތިމާ ހުރުމުގައި ތިމާއަށް ކުރެވިދާނޭ ކޮންމެ ވެސް ހެޔޮ ރަނގަޅު ކަންތައްތަކެއްވާ ކަމެވެ. ރޯދަ މަހަކީ، ތިމާގެ ނަފްސުގެ އެންމެ ފުންމިނަށް ފީނައި އެ ކަންކަަމީ ކޮބައިތޯ ބަލައި އެކަންކަން ކުރުމަށް މަގުފަހިވެގެންދާ މަހެކެވެ.
2. އަހަރުމެން އުފަންވަނީ ރޫހާނީ ވަރަތަކަކާ އެކުގައެވެ. ރޯދަ މަހަކީ އެ ރޫހާނީ ވަރަ ބޭނުންކޮށްގެން، ރޫހާނިޔައްޔަތު ދިރުވައި ހެޔޮކަމުގެ ޖައްވުގެ ތެރޭގައި އުދުހުން މެދުވެރިކޮށްދޭ މަހެކެވެ. އެހެންވެ، އެންމެން ވެސް، އެ ރޫހާނީ ވަރައިގެ އެހީގައި ހެޔޮކަމުގެ އާލަމުގައި އުދުހެން އާދަކުރަންވީއެވެ.
3. ރޯދަ މަހަކީ އަހަރުމެންގެ ދީންވެރިކަން އަހަރުމެން އެއްބައި ކުރާ އެއްޗަކަށް ހަދަން މަސައްކަތް ކުރުމުގެ ރަނުގެ ފުރުސަތެއް ލިބޭ މަހެކެވެ. އެހެންވެ، ދީނުގެ ފަރުއީ ތަފާތުތަކުގެ މައްޗަށް އަހަރުމެންގެ އަމާޒު ހުއްޓުނަ ނުދީ ދީނުގެ ޖައުހަރުގެ މައްޗަށް އަހަރުމެންގެ އަމާޒު ހުއްޓުވައި އެކަމާ މެދު ވިސްނަންވީއެވެ. ދީނުގެ އަސާސީ އަމާޒަކީ إن الصلاة تنهى عن الفحشاء… މި އާޔަތުގައި ބަޔާންކޮށް، ކޮންމެ ހުކުރު ދުވަހަކު މިކަން ހަނދާންކޮށްދޭ ފަދައިން، މުއުމިނާ ހެޔޮލަފާ މީހަކަށް ހަދާލުމެވެ. ޝިރުކުކުރުމާއި ޒިނޭކުރުމާއި މަސްތުވާތަކެތި ބޭނުން ކުރުން ފަދަ، އެއްވެސް ދެބަސްވުމެއް ނެތް، ކަނޑައެޅިގެން ހަރާން ކުރެވިފައިވާ ކަންކަމާ ދުރުވެ، އެންމެނަށް ވެސް ހެޔޮ އެދި، އެންމެނަށް ވެސް ހެޔޮ ގޮތުގައި މުއާމަލާތް ކުރުމެވެ.
4. ’ފިތުނަ’، މި ލަފްޒުގެ އަސްލު މާނައަކީ ކޮބައިހެއްޔެވެ؟ މި ލަފްޒުގެ އަސްލު ގުޅެނީ އަރަބި ބަހުގެ فتن މި ލަފްޒާއެވެ. މާނައަކީ އެންދުމެވެ. ރަނާއި ރިހި އަލިފާނަށް ލައި އެންދުމެވެ. އޭގައި އެކުލެވޭ ކުނިބުނި ވަކިކޮށް ސާފުކުރުމަށެވެ. މި އަސްލު މާނައިން އެހެން މާނަތައް ނެގިފައި ވެއެވެ. ދަތި ދެރަގޮތް މެދުވެރިވެ، މީހާގެ އީމާންކަމާއި ހެޔޮލަފާކަން އިމްތިހާނު ކުރުމުގެ މާނައިގައެވެ. ނުރަނގަޅު ވާހަކަތައް ދައްކައި، ދޭދޭ ގުޅުންތައް 'އަންދާލައި' ނެތިކޮށްލުމުގެ މާނައިގައެވެ.

ރޯދަ މަހަކީ މުއުމިނާ ވެސް 'ފިތުނައަކަށް’، އެބަހީ އިމްތިިހާނަކަށް ހުށަހެޅޭ މައްސަރެކެވެ. ކެތްތެރި ކަމުގެ އިމްތިހާނެވެ. ހެޔޮކަންތައް ކުރުމުގެ އިމްތިހާނެވެ. މި އިމްތިހާނުގެ ބޭނުމަކީ ކޮބައިހެއްޔެވެ؟ ރަނާއި ރިހި އަލިފާނަށް ލައި އެ އެއްޗެހި އިމްތިހާނުކޮށް ސާފުކުރެވޭ ފަދައިން، އިންސާނާގެ ރަނުގެ ޖައުހަރު، މާއްދީ ބައެއް ކަހަލަ ކަންކަމާ އޭނާ ދުރުކުރުވައި އޭނާގެ އެ ޖައުހަރު ސާފުކުރުމެވެ. އެހެންވެ، ރޯދަ މަހުގެ، 'ފިތުނަ’، އާދެ، އިމްތިހާނުގެ ބޭނުން ހިފައި ތިމާގެ ރަނުގެ ޖައުހަރު ސާފުކޮށް، ތިމާއީ މަތިވެރި އަޚުލާގެއްގެ ވެރި މީހަކަށްވޭތޯ މަސައްކަތްކުރާށެވެ!