ތިރީގައި މިވަނީ ކީރިތި ރަސޫލާ ﷺ އަބުއްދަރުދާއަށް ކުރެއްވި ވަޞިއްޔަތްތަކުގެ ތެރެއިން މުހިންމު ބައިތަކެވެ.
- ތިބާގެ ހަށިގަނޑުގެ ގުނަވަންތައް ކޮށާ ބުރިބުރިކުރި ކަމުގައި ވީނަމަވެސް މާތް ﷲ އަށް ޝަރީކު ނުކުރާށެވެ.
- ގަސްތުގައި ނަމާދު ދޫކޮށްނުލާށެވެ. ގަސްދުގައި ނަމާދު ދޫކޮށްލާ މީހާގެ އެކަލާނގެ ޒިންމަތުން ބަރިއްޔަވެގެން ވެއެވެ.
- ރާ ނުބޯށެވެ. އެއީ ހުރިހާ ނުބައިކަމެއްގެ ތަޅުދަނޑިއެވެ.
- ތިބާގެ މައިންބަފައިންނަށް ކިޔަމަންތެރިކަން އަދާކުރާށެވެ. އެއީ ތިބާ މި ދުނިޔެ އަޅާފައި ދާން ބުނިކަމުގައި ވިޔަސް މެއެވެ.
- ވެރިމީހާއާ ދެކޮޅުވެރިނުވާށެވެ. އެއީ ވެރިމީހާ އަކީ ތިބާ ކަމުގައި ފެނުނު ކަމުގައި ވިޔަސް މެއެވެ.
- ހަނގުރާމައިގެ މައިދާނުން ފިލަން ނުދުވާށެވެ. އެއީ މައިދާނުގައި ތިބާ އެކަނި ހުންނަން ޖެހުނު ކަމުގައި ވީނަމަވެސް މެއެވެ.
- ތިބާގެ ތަނަވަސްކަމުން ތިބާގެ އަހުލުވެރިންނަށް ހޭދަކުރާށެވެ.
- ތިބާގެ އަހުލުވެރިން ތިބާގެ ހިޔާވަހިކަމުން ދުރުނުކުރާށެވެ.
- މާތް ﷲގެ ބިރުވެރިކަން އެމީހުންގެ ހިތަށް ވައްދާށެވެ.