ތިރީގައި މި ވަނީ އެވޭލާ ޒަމާނުގެ ރޯމުގެ ސިޔާސީވެރިއެއް ކަމަށްވާ ސިސެރޯގެ (43-104 މީލާދުގެ ކުރި) ހިކުމަތުގެ ބަސްކޮޅެކެވެ.
- ހިތާމައިގެ ސަބަބުން، އިސްތަށިގަނޑަށް ދަމައި އިސްތަށިތައް އުފުރަން އުޅުމަކީ މޮޔަކަމެކެވެ. ތަލަވެ، ބޮލުގައި އިސްތަށި ނެތުމުން، ހިތާމަ މެދުވެރިކުރުވާ ވޭނުގެ އަސަރު ކުޑަވޭ ހެއްޔެވެ؟
- ފޮނި ވާހަކަތަކުގެ މައްޗަށް އެކުލެވޭ ތަގުރީރުތަކަކީ ބަލިކަށިކަމުގެ ފުރަތަމަ އަލާމަތެވެ. މޮޅެތި ކަންކަން ކުރުމުގެ ކުޅަދާނަކަން ލިބިގެންވާ މީހުން، އެކަންކަން ކުރަނީއެވެ. އެފަދަ ގާބިލު މީހުން، އެމީހުންގެ ގާބިލުކަން ދެއްކުމަށްޓަކައި މާ ގިނައިން އަނގަހުޅުވައި ފޮނި ވާހަކަތައް ދައްކާކަށް ނުހަދައެވެ.
- މަރުވެ، މި ދުނިޔެ ދޫކޮށްފައިދާ މީހުން، ދިރި ތިބެނީ ދިރިތިބޭ މީހުންގެ ހަނދާނުގައެވެ.
- އިނބަގެ ދުޝްމަނަށް އިނބަ މަރާލެވިދާނެއެވެ. އެހެންވިޔަސް، އިނބަގެ ހިތުގައި ޖެއްސޭނީ ހަމައެކަނި އިނބަގެ ރަހުމަތްތެރިންނަށެވެ.
- ކޮންމެ މީހަކަށް ވެސް އޮޅިގެން ކުށެއް ކުރެވިދާނެއެވެ. ނަމަވެސް، އެ ކުށް ކުރުން މަތީ ދެމިހުންނާނީ މޮޔައެކެވެ.
- ބަދަލުވެ، ފުރޮޅެމުންދާ ނަސީބު، ރަހުމަތްތެރިންގެ މައްޗަށް އޮންނަ އިތުބާރު އިމްތިހާނުކޮށްލައެވެ.
- ހަނގުރާމައިގެ ދުވަސްވަރު، ގާނޫނުތައް ހަމަހިމޭންވެއެވެ.
- މީހުންނަށް ހެޔޮކޮށް ހިތުން، އެމީހުންނަށް ބިރުދެއްކުމަށް ވުރެ މާ ބާރުގަދަވެގެން ވެއެވެ.
- ދިރުން ލިބިގެންވާހާ ހިނދަކު އުއްމީދު އޮވެއެވެ.
- އެންމެ މަތިވެރިގެންވާ ފަތަހައަކީ، ކާމިޔާބަކީ، އަމިއްލަ އެދުމާއި ދަހިވެތިކަން ފަދަ އިނބަގެ ނަފްސުގެ ނުބައިކަމުގެ މައްޗަށް ހޯދާ ފަތަހައެވެ. ކާމިޔާބީއެވެ.
- ބައެއް ފަހަރު، ހާދިސާތައް މެދުވެރިކުރުވާ ސަބަބުތައް، އެ ހާދިސާތަކަށް ވުރެ ވެސް ޝައުގުވެރިއެވެ.
- ފޮތަކީ އަހަރުމެންނަށް ދުވަހަކުވެސް ބޭވަފާތެރިނުވާނޭ އެކުވެރިޔާއެވެ.
- އީމާންކަމުގެ މީހާއަކީ ކެރޭނޭ ވެސް މީހެކެވެ.
- ގުދުރަތުން އަހަރުމެންނަށް ދެއްވާފައި އޮތް ހަޔާތުގެ މުއްދަތު ކިތައްމެހާ ވެސް ކުރެވެ. ނަމަވެސް، ހެޔޮ ގޮތުގައި ހޭދަކޮށްލެވޭ ހަޔާތުގެ ހަނދާންތައް އަބަދުގެ އަބަދަށް ދެމިގެންދެއެވެ.
- އެމީހަކު ދެކެ އިނބަ ބިރުގަނެ ޖެހިލުންވާ މީހާ، ނޫނީ އިނބަ ދެކެ އެމީހާ ބިރުގަނެ ޖެހިލުންވާ މީހާ، މިފަދަ މީހެއް ދެކެ އިނބައަށް ލޯތްބެއް ނުވެވޭނެއެވެ.
- އިންސާނާގެ ހަށިގަނޑަށް ޖެހޭ ބަލިތަކަށް ވުރެ، އޭނާގެ ރޫހަށް ޖެހޭ ބަލިތައް ގިނަވެފައި މާ ނުރައްކާތެރިއެވެ.
- ކުށަށް އަދަބު ނުލިބުމަކީ ކުށްތަކަށް އަރައިގަތުމަށް ދެވޭ އެންމެ ބޮޑު ހިއްވަރެވެ.
- ހިކުމަތުގެ ވަޒީފާއަކީ ހެވާއި ނުބައި ވަކިކޮށް ބުނެދިނުމެވެ.
- ގާނޫނުތައް އަހަރުމެން ބަނދެ ހިފަހައްޓަނީ އަހަރުމެން މިނިވަނުންގެ ގޮތުގައި ބޭތިއްބުމަށެވެ.
- ކޮންމެ ކަމެއް ވިޔަސް، އެކަން ކުރަން ފެށުމުގެ ކުރިން، ވަރަށް ރަނގަޅަށް ތައްޔާރުވާން ޖެހެއެވެ.