އަހަރުގެ އެންމެ ފުރިހަމަ ތިން މާހަނދު މި ޖުލައި މަހުގެ 12، 13 އަދި 14 މި ތިން ދުވަހުގެ ރޭ ދިވެހިރާއްޖޭގެ ހުރިހައި ރަށަކަށް ވެސް ވަރަށް ރީތިކޮށް ފެންނާނެއެވެ. ބޮޑު ޢީދު ޗުއްޓީ ދުވަސްވަރާ ދިމާވި މި ޤުދްތަރީ ރިވެތި މަންޒަރާއި ހަނދުވަރުގެ ހިތްފަހިކަން، ދިވެހި ފަތުރުވެރީންނަށް ޙިއްޞާކުރާން ލިބޭކަމީ ކޮވިޑުގެ ވަބާގައި ބަންދުވެގެން ތިބުމަށްފަހު ވީއްލުމުން ގިނަ ބަޔަކު ރާއްޖޭގެ ކަންކޮޅުތަކުގައި ޢީދުގެ އުފާ ފާޅުކުރާއިރު ރޭގަނޑުގެ ވަގުތު ތަކުގެ ޙަރަކާތްތަކަށް ލިބޭ އިތުރު ޤުދްރަތީ ހަދިޔާއެކެވެ.

ޢާންމު ފުލްމޫނުގެ ރޭރޭގެ ހަނދުވަރަށް ވުރެ، މި ޖުލައި މަހުގެ ފުލްމޫންގެ ރޭތަކުގައި ދޭ ހަނދުވަރުގެ އަލިގަދަކަން %30 އިތުރުވާނެއެވެ.

ޖުލައި 13 ވަނަ ދުވަހުގެރޭ މާލޭގަޑިން 23:36 ގައި ދަނަ ރާހީގެ މުލަ ނަކަތުގެ 3 ދަރަޖަ 59 ދަގީގާ ހަނދު އަރައި ހަމަވާ ވަގުތު ދުނިޔެއާ 357،000 ކިލޯމީޓަރު ކައިރީގައި ހަނދު ހުންނާނެތީ އާއި، އަދި އެއީ، އެރޭ މާލެއަށް ހަނދު މެދަށް އައުމުގެ ކުޑަކުޑަ ވަގުތުކޮޅެއްގެ ކުރީގެ ވަގުތުކޮޅަކަށް ވުމުން، މި ފުރިހަމަ މާހަނދު މުޅި ރާއްޖެއަށް ވެސް އެންމެ ފުރިހަމައަށް ފެންނާނެއެވެ.

މި ދުވަސްވަރަކީ ރާއްޖެ ދެކޭ އެންމެ ގަދަ ވިއްސާރަ މޫސުން ކަމުގައިވާ ޖުންޖުލާ ވިއްސާރައިގެ ތެރެއިން އެންމެ ގަދަ އެއް ނަކަތް ކަމުގައިވާ ފުނޯސް ނަކަތް ބަލިވެ ފުސްނަކަތުގެ ބަނޑަށް ދަމާލާފައި "ދަހަނގު" ވެފައި އޮންނަ ދުވަސްވަރަށް ވުމުން، މި އަހަރުގެ އެންމެ ފުރިހަމަ، މާހަނދުގެ ސިލްސިލާގައި ހިމެނޭ ތިން މާހަނދު ވެސް، މުޅި ރާއްޖެއަށް އެންމެ ފުރިހަމައަށް ފެންނާނެއެވެ.

ޖުލައި 13 ވަނަ ދުވަހު މާލެއަށް ހަނދު އުދަވާނީ ޢަޤްރަބުއީރާނުގެ ދެވަނަ ދަރަޖަވީ ދިމާއިންނެވެ. އެއީ، އެޒިމުތު 117 ދަރަޖަވީ ދިމާއެވެ. އާދައިގެ ބަހުރުވައިން ނަމަ އެއީ، މާލޭގެ އިރުދެކުނުގެ މިޞްރާބެކެވެ.