ކޮޔާއޭ ހިތް އެދޭ ގޮތަކަށް ފޮޔާ މޫސުން ނުފޮރޮޅޭނޭ
އޮޔާވައި ފަހިވެ އޮޑިދުއްވޭ ދުވަސްވަރު ދާދި މަދުވާނޭ
ކުރޮޅިތެލި ނާއްޓަކާ އެއްފަދަ ނުލާހިކު ސާފު ރީތި ދުވަސް
ފުރޮޅިގެންގޮސް އަނދުން ފަތެކޭ ބުނާ ކުލަވަރު އަރައިފާނޭ
ފުރާ ދަތުރެއް ނިޔާމައިގައި ދެބައިދެމެދަށް ނުކުމެ ހުއްޓައި
ތުރާތައް ފޮށި ވިލާކޮޅަކުން ހުރަސް ދަތުރަށް އަޅައިފާނޭ
ހުޅަނގު މޫސުމުގެ ރާޅާވައި ޖެހޭއިރުގައި ވޮޑޭ ތުނޑިތައް
އުޅަނދު ދުއްވޭވަރަށް ފުންކޮށް ގިރާލައި ނެތިހިނގައިދާނޭ
ކެތީފެނުގައި ލިބޭ ދިރުމުން ފަޅާ ގަސް މާމަލާއި ފޮޅޭ
ނެތީޔޭ ދެމިހުރުން މިއަހެލި މުޅަށް އެޅުމުން މިލައިފާނޭ
ވިދާބަބުޅާ ތަރިން އުޑުމަތި ޖަރީވެވި ފަރިވެގެން ވަނިކޮށް
ވިދާ ގުގުރާ ވިލާއިން ކަޅު ފޮރުވި ފަރުދާ ވެގެންފާނޭ
ގޮވާން އިންދައި ހަދާ ބިންބިން ވެހޭ ވާރޭގެ ފެންހަރުލާ
ހޮވާން ހިކިހުއިލިބޭ ހަނަފަސް ބިމެއް ކަމުގައި ވެގެންފާނޭ
ހެދޭ ބިޔަ ގަސްގަހުގެ އާރާ ލަކުޑި ވަރުގަދަވެ ހަރުވީމާ
ތެދޭ މަކޮޔާ ގަހަށް ލޮޅުމެއް ނުހެލި ގޮފި ގައިމެ ނާރާނޭ
ޖެހޭވައި ބާރުވާވަރަކުން ބިމުގެވިނަ ބޯލަނބައި ލެނބުނަސް
ނެހޭނޭކަން ލަކުޑި ބިޔަގަސް ވަޔާލެނބުމަށް އެނގެންވާނޭ
ވިލާތައް ތަރިތަކާ ނަކަތާ ދެ މޫސުން ދިޔަވަރާ ރަނގަޅަށް
ފިލާ މޮޅުކެޔޮޅަކަށް ނުވަނީސް ފުރަން އޮޑިޔަކު ނުވެސްވާނޭ
