ތިރީގައި މިވަނީ ދިވެހިން ވާހަކަ ދައްކާއިރު އާންމުކޮށް ބޭނުންކޮށް އުޅޭ ބައެއް ބަސްބަހާ ގުޅުވައިގެން ތައްޔާރުކޮށްލައިފައިވާ އަދަބީ ވިލާވަޅެއް، ވަރަށް ކުރުކޮށެވެ.
- އެނބުރި އައުމާއި އަނބުރާ އައުން
އެނބުރި އައުމާއި އަނބުރާ އައުން ތަފާތެވެ. އެނބުރި އައުން ބޭނުންކުރަނީ އާންމުކޮށް އިންސާނުންނަށެވެ. އަނބުރާއައުން ބޭނުންކުރަނީ އުޅަނދުފަހަރަށެވެ.
މިސާލު:
އަލީ ޗުއްޓީން އެނބުރި އައީ އިއްޔެއެވެ.
މަނަދޫ ބޯޓު އަނބުރާ އައީ ނ. އަތޮޅާ ހަމައަށް ގޮސްފައެވެ.
- އެދެމެވެ./ އެދެއެވެ.
އެދެމެވެ. ބޭނުންކުރާނީ މީހަކު ނުވަތަ ބަޔަކު އަމިއްލަ ހައިސިއްޔަތުން ކަމަކަށް އެދޭނަމައެވެ. އޮފީހަކުން ނުވަތަ ތަނަކުން ކަމަކަށް އެދޭނަމަ ލިޔާނީ އެދެއެވެ.
މިސާލު:
މިކަން އަޅުގަނޑަށް ހަމަޖައްސަވައިދެއްވުން އެދެމެވެ.
މިކަން ހަމަޖައްސަވައިދެއްވުން މި އޮފީހުން އެދެއެވެ.
- ނިސްބަތް ކުރެވޭ ދެ ފިލީގެ ފަހަތަށް ކޮންމެހެން "ގެ" ޖަހާކަށް ނުޖެހެއެވެ.
މިސާލު:
މާލޭގެ މީހެއް، މަނަދޫގެ މީހެއް، އެގޭގެ މީހެއް، މިއީ ރަނގަޅު ގޮތެއް ނޫނެވެ. ރަނގަޅު ގޮތަކީ މާލޭ މީހެއް، މަނަދޫ މީހެއް، އެގޭ މީހެއް މިގޮތެވެ.
- ވަމުން އަންނަނީ/ ވަމުން ދަނީ
ވަމުން އަންނަނީ ބޭނުންކުރުން ރަނގަޅީ ރަނގަޅާ ގުޅުވައިގެންނެވެ. ވަމުންދަނީ ބޭނުންކުރުން ރަނގަޅީ ނުރަނގަޅު ނުވަތަ ގޯސްވަމުންދާ ކަންކަމުގައެވެ.
މިސާލު:
ކޮވިޑުގެ ހާލަތު އަންނަނީ ރަނގަޅުވަމުންނެވެ. ކޮވިޑުގެ ހާލަތު ދަނީ ގޯސްވަމުންނެވެ.
ޢަލީގެ ބަލިހާލަތު ދަނީ ބޮޑުވަމުންނެވެ. އޭނާގެ އުޅުން ދަނީ ގޯސްވަމުންނެވެ.
- މައުލޫމާތު: އަބްދުﷲ ސަޢީދުގެ ލިއުއްވުމަކުން ނަގައިފައި
advertisment
