ބާބިލްގެ ނަލަ ގުލްޝަންތެރޭ ފޮޅި ފަރިވަމުންދާ މާތަކުން
ޤާބިލް މަލެއް ފެންނާނެހޭ މޯޅިވެ ނުދާނޭ މާތަކުން
އިރު އޮއްސުމުން ހަނދުވަރުގެ އަލި އުދަރެސްމަތީގައި ފެތުރުނަސް
އިރުއުދަރެހުން ފާއްދާލުމުން ހަނދު ފަނޑު ނުވޭހޭ އަލިތަކުން
އަގުބޮޑު ވިދާ ރަންމުތްތަކާ މާވަހަރު ޖައުހަރުތަކުތެރޭން
އަގުބޮޑު ހުދަންބަރު ވަކިވެވޭހޭ ނުބަލަނީނަމަ ޓެސްޓަކުން
ފިރުމާލަދޭ ފިނިރޯޅިތައް މެންދުރުގެ ހޫނުން ފިހެވިގެން
ދިރުވާލަދޭ ރޫޙުން ލިބޭހޭ ފިނިކަމެއް ނަލަ އަސުރަކުން
ޢިލްމުގެ ކަނޑަށް ފީނާތިބާ ރަންމުތްތަކެއް ހޮވިއަސް އަތުން
ޙިލްމެއް ނުވާ ނަމައީ ލިބޭނޭހޭ އެމުތްތައް ހުނަރަކުން
މަންޒިލް އަމާން ލިބުމަށް އަދައިފުރިއަސް ތިބާ ދުރުދަތުރަކަށް
މަންޒިލް ލިބޭހޭ ދަތުރުގައި މިސްރާބު ނުބަލާ އުޅަނދަކުން
އަގުހުރި ރަނުގެ ގަހަނާތަކުން ޒީނަތްވިއަސް އަދު ލޯތަކަށް
އަގުހުރި ރަނާ ރިހިވަކިވެވޭ ހެ ތިލޭރުކަން ނެތި ހުނަރަކުން
ލަކުޑީގެ އަގު ބާޒާރުގައި އެކި ދަރަޖައިން ހުއްޓަސްލިބެން
ލަކުޑީގެ މޮޅުކަން ބުނެދެވޭ ހޭ މާވަޑިން ނެތި އަމުދަކުން
އެކަމަކު ސުލޫކާ ޚުލްޤު އަދި އަދަބާއި ޢިލްމީފެންވަރާ
މިކަހަލައެތައް ކަންތައްތަކެއް އެނގިދާނެ ބުނެލާ ބަސްތަކުން