އައްޑޫ ސިޓީ މީދޫގައި ކުރިއަށްދާ މުއައްސަސާތަކުގެ ނެޓްބޯޅަ މުބާރާތުގެ ސެމީފައިނަލް ފުރަތަމަ މެޗުގައި، ޕޮލިސް ރެކްރިއޭޝަނާއި ޝަރީފީ ޕްރީ ސްކޫލްގެ ހުދުހުދު ޓީމު އަދި ދެ ވަނަ މެޗުގައި ހުޅުދޫ ޔޫތު ސެންޓަރާއި ޓީމު އައްޑޫ ފިޝަރީޒް ކޮމްޕްލެކްސް މާދަމާ ރޭ ވާދަކުރާ ގޮތަށް ހަމަޖެހިއްޖެއެވެ.
ހުޅުދޫ މީދޫގެ މުއައްސަސާތަކަށް ހުޅުވާލައިގެން، މީދޫ އެކުވެރިންގެ ޗޭނުގެ ފަރާތުން ޖުމްހޫރީ ދުވަހުގެ މުނާސަބަތާ ގުޅުވައިގެން މި މަހުގެ 11 ދުވަހު ފެއްޓި "އެމް.އީ.ސީ ބަދަހި ކަޕް 2020″ގެ ސެމީފައިނަލްގެ ފުރަތަމަ މެޗު ފަށާނީ މާދަމާރޭ 8 ޖަހާއިރުއެވެ. ދެވަނަ މެޗު 9 ޖަހާއިރު އެވެ. މި ދެ މެޗުން މޮޅުވާ ދެ ޓީމު ފައިނަލްގައި ބައްދަލުުކުރާނީ އަންނަ ބުރާސްފަތި ދުވަހުގެ ރެއެވެ.
މި މުބާރާތުގައި މުޅިއަކު ނުވަ ޓީމު ވާދަކުރިއެވެ. ސެމީން ޖާގަ ނުލިބުމުން ސަދަން ޓްރާންސްޕޯޓް ލިމިޓެޑާއި ފެނަކަ ކޯޕަރޭޝަނާއި އެސް.ޓީ.އޯ 164 އާއި އެސް.ޓީ.އޯ ފާމަސީ އާއި މޯލްޑިވްސް ޕޯޓްސް ލިމިޓެޑްގެ ޓީމު ވަނީ މުބާރާތުން ކަޓައިފައެވެ.
މީދޫ އެކުވެރިންގެ ޗޭނުގެ ފަރާތުން ބުނިގޮތުގައި އެ ޖަމްޢިއްޔާގެ ފަރާތުން މި ފަދަ މުބާރާތެއް ރާވައި ހިންގުމުގެ ބޭނުމަކީ ހުޅުދޫ މީދޫ މުއައްސަސާތަކުގެ މެދުގައި އެކުވެރިކަން އާލާކޮށް ކުޅިވަރުގެ ރޫޙު ދިރުވައި، ހުޅުދޫ މީދޫ ޒުވާނުންގެ މެދުގައި އެކުވެރިކަން ބަދަހިކުރުމާއި، ޒުވާނުންގެ ހުނަރުތައް ދައްކާލުމުގެ ފުރުޞަތު ހުޅުވާލުމާއި، މުޖުތަމަޢުގެ ތެރޭގައި އިޖްތިމާޢީ ދުޅަހެޔޮކަން އިތުރުކޮށް ކުޅިވަރުގެ ރޫޙު އާލާ ކުރުމެވެ.