އިންގްލިޝް ޕްރެޕަރޭޓަރީ އެންޑް ސެކަންޑަރީ ސްކޫލް (އީޕީއެސް ސްކޫލް) ހަނދާން އާކޮށް ދިރުވުމުގެ ގޮތުން މަޖައްލާއެއް ނެރެ ވެބްސައިޓެއް އިފްތިތާޙުކޮށްފިއެވެ. ސްޓެލްކޯ މާލަމުގައި މިއަދު ހެނދުނު ބޭއްވި ޚާއްޞަ ރަސްމިއްޔާތެއްގައި "އީޕީއެސް ހަނދާން"ގެ ފުރަތަމަ ޢަދަދު ނެރެދެއްވީ ރައީސުލްޖުމްހޫރިއްޔާގެ ނާއިބު ފައިޞަލް ނަސީމެވެ.

މަޖައްލާގެ މި ޢަދަދުގައި އީޕީއެސްގެ ކުރީގެ ދަރިވަރުންގެ ތެރެއިން މަޝްހޫރު ބައެއް ލިޔުންތެރީންނާއި ޢީލްމީ ބޭފުޅުންގެ ލިޔުންތައް ހިމެނުއްވައިފައިވެއެވެ. މަޖައްލާގެ މި ޢަދަދުގައި ހިމަނައިވައިފައިވާ ލިޔުންތައް ވަނީ ތިން ބަޔަކަށެވެ. އެއީ އީޕީއެސްގެ ތާރީޚާއި ސަގާފަތް ދިރުވައިދިނުމާއި ޢިލްމީ ލިޔުންތަކާއި އިޖުތިމާޢީ ލިޔުންތަކެވެ.

މި ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނާއިބު ވަނީ އެ މަނިކުފާނުގެ ސްކޫލު ދައުރުގެ ހަނދާންތައް އައުކުރައްވާ، އީ.ޕީ.އެސް. ސްކޫލުން ދަރިވަރުންގެ ތަރުބިއްޔަތަށް ކުރެއްވި ގިނަގުނަ މަސައްކަތްތައް ފާހަގަކުރައްވާފައެވެ. އެ ގޮތުން، އީ.ޕީ.އެސް. ސްކޫލުން ދަރިވަރުވި އެތަކެއް ބަޔަކު މިއަދު ޤައުމުގެ ޒިންމާދާރު އެކިއެކި މަޤާމުތަކާއި މަސައްކަތްތަކުގައި ޚިދުމަތްކުރަމުންދާކަން އެ މަނިކުފާނު ފާހަގަކުރެއްވިއެވެ. އެހެންކަމުން، ދަރިވަރުންގެ ތަޢުލީމާއި ތަރުބިއްޔަތަށް އީ.ޕީ.އެސް. ސްކޫލުން ކޮށްދީފައިވާ މަސައްކަތްތައް ފާހަގަކުރައްވައި އެ ސްކޫލުގެ ކުރީގެ ހިންގުންތެރިންނާއި މުދައްރިސުންނަށް އެ މަނިކުފާނު ޝުކުރު އަދާކުރެއްވިއެވެ.

ރައީސުލްޖުމްހޫރިއްޔާގެ ނާއިބު ވިދާޅުވީ އީ.ޕީ.އެސް. ސްކޫލަކީ 26 ހާހަށްވުރެ ގިނަ ދަރިވަރުން ހެޔޮގޮތުގައި ބައްޓަންކުރި ސްކޫލެއް ކަމަށް ވާތީ، އެއީ ހަނދާން ނައްތައިލައިގެންވާނެ ނަމެއް ނޫން ކަމަށެވެ. އީ.ޕީ.އެސް. ސްކޫލުން ތަޢުލީމު ނުލިބުނު ނަމަ ޚުދު އެ މަނިކުފާނު މިއަދު މި މަޤާމުގައި ނުހުންނެވީސް ކަމަށް ވެސް ވިދާޅުވިއެވެ. މި ފަދަ ސަބަބުތައް ހުރުމާއެކު އީ.ޕީ.އެސް. ސްކޫލްގެ ނަމުގައި އަލުން ސްކޫލެއް ޙަރަކާތްތެރިވާތަން ދެކެވަޑައިގަތުމަކީ އެ މަނިކުފާނުގެ އުންމީދެއް ކަމަށް ވެސް ރައީސުލްޖުމްހޫރިއްޔާގެ ނާއިބު ވިދާޅުވިއެވެ.

މި ޖަލްސާގައި އީ.ޕީ.އެސް. ސްކޫލުގެ ވެބްސައިޓް އިފްތިތާޙުކޮށްދެއްވީ އީ.ޕީ.އެސް. ސްކޫލް ފައުންޑޭޝަންގެ ރައީސް އަލްއުސްތާޛު އަޙުމަދު ހަމްޒާއެވެ. ވެބްސައިޓް އިފްތިތާޙުކުރެއްވުމަށް ފަހު ވާހަކަފުޅު ދައްކަވަމުން، ހަމްޒާ ވިދާޅުވީ އިޕީއެސް ވުޖޫދަށް ގެނައުމުގެ މަސައްކަތް ވަރަށް ބާރަށް ކުރިޔަށްދާ ކަމަށެވެ. އަދި އީ.ޕީ.އެސް. ސްކޫލްގައި ކިޔަވައިދެއްވި ހުރިހާ މުދައްރިސުންނަށާއި ޕްރިންސިޕަލުންނަށާއި ފައުންޑަރ މެންބަރުންނަށް ވެސް ޝުކުރު އަދާކުރެއްވިއެވެ.

އީ.ޕީ.އެސް. ސްކޫލް އުފެދުނީ 1968 ވަނަ އަހަރުގެ ޖޫން މަހުގެ 21 ވަނަ ދުވަހުއެވެ.