ހަތިޔާރުއެޅި މީހުންގެ ހަރަކާތްތަކާ ދެކޮޅަށް ޕާކިސްތާންގައި ބޭއްވި ސުލްހަވެރި މުޒާހަރާއަކަށް އަމިއްލައަށް މަރުވެގެން ދިން ހަމަލާއެއްގައި 14 މީހުން މަރުވެއްޖެއެވެ.
ސުވަތު ވާދީގައި އޮތް މުޒާހަރާއަށް އިއްޔެ ހަމަލާދިނުމުން މަރުވި މީހުންގެ ތެރޭގައި ނުވަ އާއްމުންނާއި ފަސް ފުލުހުން ހިމެނެއެވެ. އަދި ދެ ދޮޅަހަށްވުރެ ގިނަ މީހުން ޒަހަމްވިއެވެ.
ބޮންގޮއްވައިލީ ކަބަލް ވިލެޖްގައި ހުރި ފުލުހުންގެ މަރުކަޒެއް ކައިރީގައެވެ. މުޒާހަރާކުރުންތެރިން ތިބީ އެ ޕޮލިސް ސްޓޭޝަން ކައިރިއަށް އެއްވެފައެވެ. އެ މީހުން ގޮވައިލަމުންދިޔައީ ހަނގުރާމަވެރިންގެ ފަރާތުން އިތުރުވަމުންދާ އަނިޔާވެރިކަމަށް އަޅަމުންދާ ފިޔަވަޅުތައް އިތުރަށް ހަރުކަށި ކުރުމަށެވެ.
ބޮންގޮއްވައިލިކަމުގެ ޒިންމާ އެއްވެސް ފަރާތަކުން އަދި ނުނަގައެވެ.
ރައީސް އާސިފު އަލީ ޒަރްދާރީ ހަމަލާ ކުށްވެރިކުރެއްވިއެވެ.
"ޓެރަރިޒަމާ ދެކޮޅަށް ގައުމުގައި އޮތް އަޒުމް، ސުލްހައިގެ ދުޝްމިނުންނަށް ނިކަމެއްޗެއް ނުކޮށްލެވޭނެ،" އޭނާ ވިދާޅުވިއެވެ.
ބޮޑުވަޒީރު ޝަހްބާޒު ޝަރީފު ވިދާޅުވީ "ޓެރަރިޒަމް އެއްކޮށް ފުހެލެވެންދެން އެ ކަމާ ދެކޮޅަށް އަޅާ ފިޔަވަޅުތައް ކުރިއަށްގެންދާނެ" ކަމަށެވެ.
ޒަހަމްވި މީހުންނަށް އެންމެ ފުރިހަމަ ފަރުވާ ފޯރުކޮށްދިނުމަށް އޭނާ އަމުރުކުރެއްވިއެވެ.
advertisment
