ޤަޠަރުގެ ކުރީގެ އަމީރު ޝައިޚް ޙަމަދު ބިން ޚަލީފާ އާލް ޘާނީ އަވަހާރަވުމުގެ ހިތާމައިގައި ދިވެހި ޤައުމީ ދިދަ އެއް ދުވަސް ވަންދެން ބައިދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ. މިގޮތުން ދިދަ ބައިދަނޑިއަށް ތިރިކޮށްފައި ބަހައްޓާނީ މިއަދު މެންދުރު 12 އިން މާދަމާ މެންދުރު 12 އަށެވެ.

ރައީސް އޮފީހުން ބުނާ ގޮތުގައި ރައީސުލްޖުމްހޫރިއްޔާ މިގޮތަށް ހަމަޖެއްސެވީ، ދިވެހިރާއްޖެއާއި ޤަޠަރާދެމެދު ޒަމާނުއްސުރެ އުފެދިފައިވާ ގާތް ރަޙުމަތްތެރިކަމުގެ ގުޅުމާއި، ޝައިޚް ޙަމަދު ބިން ޚަލީފާ އާލް ޘާނީ، ޤަޠަރުގެ އަމީރު ކަމުގެ މަގާމުގައި ހުންނެވިއިރު ރާއްޖެއާމެދު ބެހެއްޓެވި ގާތްކަމާއި ރާއްޖޭގެ ތަރައްޤީއަށާއި ކުރިއެރުމަށް ވެދެއްވި ދީލަތި އެހީތެރިކަމާއި އެއްބާރުލެއްވުމުގެ އަގު ވަޒަންކުރެއްވުގެ ގޮތުންނެވެ.

އުމުރުފުޅުން 74 އަހަރުގައި އިއްޔެ ހެނދުނު އަވަހާރަވި ޤަޠަރުގެ ކުރީގެ އަމީރު ފަސްދާނުލައިފައި ވަނީ ރަސްމީ ޢިއްޒަތުގައި އިއްޔެ ހަވީރުއެވެ.

ޤަޠަރުގެ ކުރީގެ އަމީރު އަވަހާރަވުމާ ގުޅިގެން ޤަޠަރުގައި ބާއްވާ ރަސްމީ ހިތާމަފާޅުކުރުމުގެ ރަސްމިއްޔާތުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ މިއަދު ހެނދުނު ވަނީ ގަތަރަށް ވަޑައިގެންފައެވެ.