ދުނިޔޭގެ އެންމެ ނުފޫޒުގަދަ އިގުތިސާދުތަކުގެ ތެރެއިން ހަތް ގައުމު ނުވަތަ ގްރޫޕް އޮފް ސެވަން (ޖީ7)ގެ އިސްވެރިންގެ މެދުގައި ބާއްވާ ސަމިޓްގައި އީރާނާއެކު އެމެރިކާއިން ހެދި ޑީލް އެމެރިކާގެ ރައީސް ޑޮނަލްޑް ޓްރަމްޕް ޕްރޮމޯޓްކުރައްވަން ފައްޓަވައިފިއެވެ.

އިއްޔެއިން މާދަމައަށް ފްރާންސްގައި ބާއްވާ، ކެނެޑާ، ފްރާންސް، ޖަރުމަނީ، އިޓަލީ، ޖަޕާން، އިނގިރޭސި ވިލާތް އަދި އެމެރިކާގެ އިސްވެރިންގެ މެދުގައި ބާއްވާ ސަމިޓުގައި ޓްރަމްޕް އިއްޔެ ވިދާޅުވީ އަންނަ ހުކުރު ދުވަހު ސްވިޒަލެންޑްގައި އީރާނާއެކު ސޮއިކުރާ، ފެބްރުއަރީ 28 ގައި އެމެރިކާ-އިސްރާއީލު އިއްތިހާދުން އީރާނާ ދެކޮޅަށް ފެށި ހަނގުރާމަ ހުއްޓައިލުމާ ގުޅޭ ސުލްހައިގެ އޮނިގަނޑުގެ ސަބަބުން އީރާނާ ދެކޮޅަށް ފެށި ހަނގުރާމަ ހުއްޓޭނެކަމަށާއި ދުނިޔޭގެ ފަސްބައިކުޅަ އެއްބައި ތެޔޮ ދަތުރުކުރާ، އީރާންގެ ބާރުގެ ދަށުގައި އޮންނަ ހުރުމުޒު ކަނޑުއޮޅި އީރާނުން އަލުން ހުޅުވައިލައިނެކަމަށެވެ.

އަހަރަކު އެއް ފަހަރު ޖީ7 ގައުމުތަކުގެ އިސްވެރިންގެ މެދުގައި ބާއްވާ ސަމިޓުގައި ޓްރަމްޕް ވިދާޅުވީ އީރާނާއެކު ހެދި ޑީލްގެ ސަބަބުން މެދުއިރުމައްޗަށް ހަމަޖެހުން ލިބުން އެކަށީގެންވާކަމަށާއި ދުނިޔޭގެ އިގުތިސާދަށް ފައިދާކުރުން އެކަށީގެންވާކަމަށެވެ.

"އަހަރެންނަށް ހީވަނީ މި ވަގުތު ވަރަށް ގިނަ، ވަރަށް ރަނގަޅު ކަންތައްތަކެއް މެދުއިރުމަތީގައި ހިނގަންދިމާވާނޭހެން. އީރާނާއެކު ހެދި ޑީލުން ދުނިޔެއަށް ބައިވަރު ކާމިޔާބީތަކެއް ލިބިގެންދާނެ،" ޓްރަމްޕް ވިދާޅުވިއެވެ.

އޭނާ އިތުރަށް ވިދާޅުވީ ޔޫކްރެއިނާ ދެކޮޅަށް ރަޝިޔާއިންކުރަމުންދާ ހަތަރު އަހަރުވީ ހަނގުރާމަ އާއި އިސްރާއީލުން ލުބްނާނަށް ދެމުންދާ ހަމަލާތައް ވެސް ހުއްޓުވައިލުމަށް އޭނާއަށް އެހީތެރިވެވިދާނެކަމަށް އުއްމީދުކުރައްވާ ކަމަށެވެ.

ޔޫކްރެއިންގެ ރައީސް ވޮލޮޑޮމިއަ ޒެލެންސްކީ އާއި ރަޝިޔާގެ ރައީސް ވްލަޑިމިއަ ޕުޓިންއާއެކު ދާދި ފަހުން ދެއްކެވި ވާހަކަތަކަށް ޓްރަމްޕް އިޝާރާތްކުރެއްވިއެވެ.

"އަހަރެމެން އިއްޔެ ވަރަށް ރަނގަޅަށް ވާހަކަދެއްކިން. އަހަރެންނަށް ހީވަނީ އެ ދެ މީހުން ވެސް ސުލްހަ ބަލައިގަންނަން ބޭނުންވާހެން،" ޓްރަމްޕް ވިދާޅުވިއެވެ.

އީރާނާ ދެކޮޅަށް ފެށި ހަނގުރާމަ ހުއްޓައިލުމުގައި ލިބުނު ކާމިޔާބަށް ޖީ7ގެ ގިނަ ގައުމުތަކުން ތާއީދުކުރިޔަސް ސަމިޓް މި ބާއްވަނީ އެމެރިކާގެ ހާރިޖީ ސިޔާސަތާއި ވިޔަފާރިން ޓެކްސް ނެގުމާއި އަދި ހުޅަނގުގެ އަސްކަރީ ޖަމިއްޔާ ނޭޓޯއާމެދު ނުތަނަވަސްކަމެއް އުފެދިފައިވާ ދަނޑިވަޅެއްގައެވެ.

ދުނިޔޭގެ ބާޒާރުގައި ތެޔޮ ފީފާއެއްގެ އަގު އިއްޔެ 83 ޑޮލަރު (1،279ރ.)ގައި ހުރެފައި މިއަދު ވަނީ 82 ޑޮލަރު (1،264ރ.)އަށް ދަށްވެފައެވެ. އީރާނާ ދެކޮޅަށް ހަނގުރާމަ ފެށުމުގެ ކުރިން އަގު ހުރީ 71 ޑޮލަރު (1،094ރ.)ގައެވެ.