ކިންގުންގެ ޓައިޓަލްގައި އިހަށް އޮތް ބާރަހާސް ރަށް ގެއްލުނީ
އިން ހަނިވެގެން ގައުމުގެ އެދިޔަ ސަބަބާ ލިޔުންތައް ގެއްލުނީ
ޅަޒުވާން ދިވެހި ޖީލަށް އެހެރަ ކަންކަން ނުލަތެ ރޭކައި މިއަދު
ނަޒުމެއްގެ ބައިތެއްގައި ވިޔަސް ލިޔެގެން އެކަން ބުނެ ނުދެވެނީ
ގައުމުގެ އިމާ ބޮޑުމިން އިހުގެ ލިޔެފައި ނުވާތީ މިތަނުގައި
ނައުނައު ފަހަރުގައި އައި ބަޔަކުން ލިޔެދިން ތަކެއްޗޭ ފެންނަނީ
ބެލް އާ މޮރެސްބީ އާ ބަތޫތާ ފަދަ ބަޔަކު ނުލިޔުނު ނަމަކަ
ގެއްލުނު ތަކެއްޗާ ތަންތަނުގެ އެނގުމެއް ނުވީސްކަން މިއެނގެނީ
ހުޅުހުޅު ޖަހައި އަންދައި ހަދާ ތަކެތީ ތެރޭގައި ހުލި ވެގެން
ހުޅުގަނޑު ނިވޭއިރު އަސަރުނެތި ފޮތްފޮތް އަނދައިގޮސް ހުލިވަނީ
ހަތްމިސްކިތާ ގަނޑުވަރު އެކަށް އަންދައިލިރޭ ހޮޅިއިން އަރައި
ފަތްފުށް ކިތައް އަޅިޔަށްވެގެން ދިޔަކަން ހަނދާން ނެތިފައިވަނީ
ހިތުހުރި އިރަކު ހިތުހުރި ބަޔަކު ހިތުހުރިގޮތަށް ލިޔެ ހެދުމުގައި
މިތުރުންގެ ވާހަކަތައް ރަނުގެ އަކުރުން ލިޔަން އިސްކަން ދިނީ
ވެރިކަމުގެ ބޭނުމުގައި މިތާ ދެމިއޮންނަ ކޯޅުން ތަކުތެރޭ
ގެރިތައް ދެބޯ ދުއްވައި ހަދަން ތާރީޚުވެސް އޮޅުވައިލަނީ
