ހަނދާނަށް އައުދެޔޭ އެދުވަސް ދިވެހި ގައުމީ ދުވަސް އައުމުން
ތަދާ ވޭންތައް ދެމުން ދިޔަ ހިތި ދުވަސްތައް ހަނދުމަކޮށް ލެވުމުން
ދިވެހި ގައުމާއި ދީނާ އަދި ސަގާފަތު ލުހެ މި ދީބުންލައި
ދިވެހި ދިދަ ބާލުވާފައި ފުރެތިކާލުން ދިދަ އުފުއްލި ކަމުން
މުޅިން މަޖްބޫރު ކުރުވައިގެން ހިލާ ބޮއްޔާ މަހާ ބާނާ
އުޅިން ގުނަމުން ވަށާ ރޯނާ ފަނާ އަތުލައި ޖިޒީ ނެގުމުން
އަރައި ރުއްރުކުގެ ބޮންތީގައި އެމީހުން ހިފިހިނދުން، ދިވެހީން
ކަރަށް ބަނގުރާ އަޅައި ބޯންދީ އިހާނެތި ވޭންތަކެއް ދިނުމުން
ފަނުން މިސްކިތް މިތާ ހުއްޓަސް އެތަންތާ ޙުރުމަތާ އެކުގައި
ތަނުން ދުޝްމިނު ޢަދުއްވުން ބަލިވުމަށް ދިޔުމުން ދުޢާ ކުރަމުން
އިޖާބަ ކުރައްވަވައި ރަޙުމަތް ފުޅުން ނަޞްރާ ނަޞީބު އައިސް
ހިޖާބު ނެގެވި ތަކުރުފާނުން ދިވެހި ދީބަށް ވިދައިލި ގޮތުން
އުތީމު ޙަސަން ތަކުރުފާނާ ދެހާޖީންނާއި ދަންޑެހެލާ
އުތީމު ރަދުންގެ މަތިވެރިވީ ޖިހާދާ ގުޅިވަޑައި ގަތުމުން
ނަގަން އަދު ވީއެއިން ޢިބްރަތް ދިމާވި އެ ޙާދިސާ ދަނެގެން
މަގަށް އުއްމަތް ދިވެހި އެޅިފައި އަބަދު އޮތުމުގެ ފިކުރު ކުރުމުން
