އިންސާނާ އުޅެމުން މިދާ ދުނިޔެއަކީ ތަފާތު ކަންކަމާ ކުރިމަތިލާންޖެހި، ނަފުސަށް ތަފާތު އިޙްސާސްތަކެއް ތަޙައްމަލުކުރަމުންދާ ދުނިޔެއެކެވެ. އެ ގޮތުން ކަންބޮޑުވުމާއި ހާސްކަމާއި ހިތާމަތައް ސިކުނޑިއަށާއި ޖިސްމަށް ކުރުވަތެވެ. ވުމާއެކު މި ކަންކަމުން އަރައިގަތުމަށް އެ އިންސާނާ އަބަދުވެސް ބޭނުންވާނެތެވެ.

މި ކަންކަން އިންސާނިއްޔަތުގެ މެދުގައި އޮންނާނެކަން ކާއިނާތުގެ ވެރި ރައްބު ދެނެވޮޑިގެންވުމާއެކު އެ އިލާހު ވަނީ އެ ކަންކަމުން އަރައިގަންނާނެ މަގުތައްވެސް އެ އިންސާނާއަށް ދައްކަވައި ދެއްވައިފައެވެ. މި ގޮތުން ޝިފާއެއް ގޮތުގައި ޤުރުއާން ބާވައިލައްވައި ޖިސްމަށް ހަމަޖެހުމެއް ކަމުގައި ނަމާދުކުރުން (ހަރަކާތްތަކެއް) ލައްވާފައިވެއެވެ. ޤަވާއިދުން މި ކަންކަމުގެ ތެރޭގައި އުޅޭ މީހަކަށް މި ކަންކަމުން ސިކުނޑިއަށާއި ޖިސްމަށް ކުރާ ފައިދާ އެނގޭނެއެވެ. މިއީ އިލާހީ ދީނަކަށް ތަބާވާ މީހުންގެ ފަރުވާއެވެ.

އިލާހީ ދީނަކަށް ތަބާނުވާ ފަރާތްތަކުންވެސް މި މަގުން އެމީހުންގެ ސިކުނޑިތަކާއި ޖިސްމަށް ފަސޭހަކަން ގެންނާނެ ގޮތްތައް ހޯދާނެ ނޫންތޯއެވެ؟ އެގޮތުން މިއަދު މަޝްހޫރުވެފައި މިވާ ޔޯގާ އަކީ އެގޮތުން ބައެއްގެ މެދުގައި އުފެދުނު އެއްޗެކެވެ. އެކަން ފެށިފައި އޮތީ ޝިވާ ނަމަކަށް ކިޔާ މީހެއްގެ ފަރާތުންނެވެ. އެއީ މިއަދު ހިންދުސްތާނުގައި ކަލާނގެއެއްގެ ދަރަޖަ ދީފައިވާ ފަރާތެކެވެ.

އެކަން ފެށިފައި އޮތީ މި ދެންނެވި ފަދައިން ރޫޙާނިއްޔަތަށް ފަރުވާއެއް ހޯދުމުގެ ބޭނުމުގައި ދީނީ އަސާސްއެއްގެ ގޮތުގައެވެ. އަދި އިރަކީ އެއީ މައިގަނޑު ރަމްޒެއް ގޮތުގައި ދެކި ކުއްތަންވުމުގެ ގޮތުން، ސިކުނޑިއާއި ހަށިގަނޑު އެ އެއްޗަކަށް (ތަފާތު ގިނަ ހަރަކާތްތަކުން) ބައްޓަން (ފޯކަސް) ކުރެތެވެ. އަޅުގަނޑުމެން ނަމާދުގައި ވަކި ފަރާތަކަށް މުޅި މީހާގެ ސިކުނޑިއާއި ޖިސްމު ހުރިހާ ހިޔާލުތަކުން އެއްކިބާކޮށް ބައްޓަންކުރާ ބީދައިންނެވެ.

އެހެންކަމުން އިރު އަރާ ވަގުތަކީ، އާންމުކޮށް (ހެނދުނު ވަގުތު) މިފަދަ ފަރާތްތައް ޖަމާވާ ވަގުތެކެވެ. އަދި މީގެ އިތުރުން މިކަމަކީ ހިންދޫ ދީނުގެ ރަސްމީ ފޮތް ކަމުގައިވާ ބަގުވަތުޤީތާ/ ވޭދާސް ފަދަ ފޮތްތަކުން ނަކަލު ކުރެވިފައިވާ އެއްޗެކެވެ.

މި ޒަމާނުގައި ޔޯގާ މަޝްހޫރުކޮށްފައި މިވަނީ، ދީނަކަށް ނިސްބަތްނުކޮށް އެހެނަސް ސަޤާފަތެއްގެ ގޮތުގައި އެ ބައެއްގެ އާދަކާދަތައް އެހެނިހެން މުޖުތަމަޢުތަކުގެ ތެރޭގައި އަހުލުވެރިކުރުވުމަށެވެ. ފިކުރީގޮތުންނެވެ. މިއަދުވެސް މި ކަންކަން ފެތުރުމުގައި އެންމެ މުގުލުގައި ތިބީ މި ދެންނެވި ހިންދޫ/ބުދިސްޓު ދީންތަކަށް ނިސްބަތްވާ ފާދިރީންނެވެ.

އޭގައި (އެބަހީ) ޔޯގާގައި ކުރާ ބައެއް ހަރާކަތްތަކުން، ސިކުނޑިއަށާއި ޖިސްމަށް ލުއިކަން ގެނެސްދިންކަމުގައި ވިއަސް، މީގެ އަސްލެއް (މައިގަނޑު) ބަދަލެއް ނުވާނެތެވެ.

{لَا تَسۡجُدُوا۟ لِلشَّمۡسِ وَلَا لِلۡقَمَرِ وَٱسۡجُدُوا۟ لِلَّهِ ٱلَّذِی خَلَقَهُنَّ إِن كُنتُمۡ إِیَّاهُ تَعۡبُدُونَ} Surah Fussilat:37

• އަޠްހަރު އަޙްމަދުގެ ލިއުއްވުމަކުން ނަގައިފައި