ހިޔަންޏެއްހެން އެކީ ގުޅިގެން އުޅެން ނޭދޭށެ އެކުވެރިޔާ
ކިޔަން ތިޔަ ފެށި މި ޅެން ނިމުމުން ސަބަބު އެނގިދާނެޔޭ ކިރިޔ
ހިމުން ދޮންވެލި ތުނޑީގައި ދޯދިތައް ބޮސްދޭން ފަތިހު ފެށުމުން
ހެމުން ފަރިދައްކަމުން ރުއްގަސް ވަޔާއެކުގައި ނަށާނެށުމުން
އެ މަންޒަރު ދެކި ލުމަށް ގުންޑޮޅިމަތީ އެ ވަގުތު މަ ހުއްޓިލުމުން
ތިމަން މިހިރީ ދެ އިސްކޮޅަށޭ ތިބާގެ ދިފާޢުގައި ބުނަމުން
ގަމަށް ގޮސް ހިޔަނި ހުސް ނުވެޔޭ، އެހެރަ ބިޔަކަން ނިމޭހެ ކިޔާ
އަރާ އިރު، މެދު އުޑުން ރަތުލޯގެ ވިހަ ދުނިތައް އުކަންފެށުމުން
ދަރާލަން ޖެހި މި މުޅި ހަށިގަނޑު މަރާ ހަނގުރާއަށް ފެށުމުން
އަރާމެއް ރައްކަލެއް އަމުދުން ނުލިބި ދެކޮޅަށް ދުވަން ފެށުމުން
ހަރާލައެ ތުން ބިމަށް މާ ކުޑަ ވެފައި މިސްކީނެކޭ ގޮވަމުން
ހަރާން ނެތް ހައިބަތެއް އެ ވަގުތު، ގުޅެން އުޅެނީ ބިމުގެ ވެއްޔާ
ފަވާލަން ސާފު އުދަރެސްތައް ހަވީރުގެ ރީތި ރިހި ވިދުމުން
ދުވާލުގެ އިރު މިޒާޖު ބަދަލްވެ ލޯބިން ތިރިވެލަން ފެށުމުން
ހުވާ ޤުދުރަތުގެ މޫރިތި އަސަރުތައް ދެކިލާ ހިތުން ދިޔުމުން
ހުވާސްހެން އައިސް އެކީ މިލިގެންފަޔޭ ބިޔަ އިސްކޮޅެއް ނެރެމުން
ހަވާސާގައި ވަކިން ހުރެވޭނެހޭ ބުނެ އިއްވަމުން އެ ނިޔާ
މިއަށް ފަހު ދެން އައީ މާ އަނދިރި ނާމާން ކަޅު އިރާކޮޅެކޭ
މެޔަށް ހަމަލާ ދިނަސް މީހަކު އެނގެން ނެތް އެ ފަދަ ދަނޑިވަޅެކޭ
ކިޔެއް ކުރެވެން އޮތީ؟ މީ ނުތަނަވަސް…ހިތްދަތި ވަގުތުކޮޅެކޭ
ހިޔަންޏެއް ނެތް، މަ ދޫ ކޮށްފައި ބަޗައިފި މިއީ ފިލާވަޅެކޭ
ކިޔަން ދެން ވަކި އޮތީ ކީކޭ ކިޔަން ވީހޭ މަކަރުވެރިޔާ
ނަސީބު ރަނގަޅުކަމުން ފުރިހަމަ ހަނދެއްގެ ލިބިއްޖެޔޭ ހަނދުވަރު
މުސީބާތުން ސަލާމަތް ވެވި ވެދިޔަ ވަގުތަށް ފަހަށް ދަންވަރު
ކަސީދާކޮށްފިޔޭ ޢާލަމް ހަނދުގެ ނޫރުން އުފުލި ދަންމަރު
ބުސީ ތައްޚާނު އަތުވެއްޖޭ އަލުން ހެދިގެން އެ ހިނދު ކަޅުކުރު
ޚަޞީލަތް ހުރި ގޮތުން ނުކިޔޭނެހޭ ސީދާ ޣަދަރުވެރިޔާ
ވިދާ އަލި ނޫރުގައި ނަމަ ހިޔަނި އޭ މިތުރާގެ ބައިވެރިޔާ
ވެދާ އަނދިރީގެ ބިރުގެތެރޭ އެއީ ވަކިވާނެ ކެހިވެރިޔާ