ކަނޑުގެ ރުޅިވެރިވެރި ބަސްތަކެއް ވާރޭ ވިލާޔަށް ރައްދުވީ
ދަނޑުތަކާ ގުލްޝަންތަކަށް ހަސަދައިގެ ތީރު އަމާޒުވީ
ބަލަ މަށާއި ފެނާރުތައް ފެން އާރުތައް ފެން ކޯރުތައް
އަލަމުގައި ލާ ނޭވައިންނެ ތިބާ އެނގޭ ހެ ވުޖޫދުވީ
އަހަރެމެންގެ ލެޔާ ދަލާ ނޫނީ ލޮލުގެ ހުރި ކަރުނަޔާ
ޖަހަޖަހައިގަނެގެން އެ ދިޔަ ރޯޅީގައޭ ތިޔަ ޚަލްޤުވީ
އޭގެ ސިއްރެއް ނޭނގުނަސް ހަމަ އުފެދުމާއެކު ފަޚްރުގައި
ލޭގެ ޤުރުބާނީން ކިތައް ބާޣު ހެ އުފެއްދީ ޖާދުވީ
ތިޔަ ޢިނާޔަތުގައި ޗަމަން، ބުސްތާނުތައް ހެއްވާލައޭ
ކިޔަކިޔާ އޮތަކަސް ދުނިޔެ ބަލަ ކިހިނަކުން ހެ އެކަން އެވީ
ދެއްވި ކީސާއެއް ޚަޒާނާއިން ބަހާން މާތް ރަސްކަލަކު
އެންމެނަށް އެ ބަހާލި މީހާ ހެއްޔެ ނަން އުފުލެން ހެވީ
ތިޔަ ކުރާ ބޭކާރު މިންނަތުގައި ތިބާ ދެކެ ނުރުހިގެން
ފިޔަ ޖަހާހާ ތަރިތަކާ ހަނދުވެސް ވަކިވެ ގޮސްފައްޔެ ވީ
ކޮންކަމެއް އެދިގެން ހެ ބަލަ ދިރުމެއް ނުވާ ސަހަރާބިމަށް
ކޮންމެހެން ފިތި މަރުވެގެން ހޭދަވެދަނީ ތިޔަ ކަރުނަވީ
އުސްވެ މައްޗަށް އެރިވަރެއް ތިރި ގެއްލިދާކަމުގައި ބުނޭ
އަސްލު އެހެނެއް ނޫން ދަރަޖަ ހަމަޔަސް ހަސަދަވެރި ލޯ ކަނޭ
ބުލްބުލެއްގެ ގޮވާލުމެއް މާތަކުގެ ފޮނި ހިނިތުންވުމެއް
ގުލްޝަނެއްގެ ނަށާލުމެއް އިޙްސާސްކުރަން ވެސް ނުމެދަނޭ
ގަސްގަހުން މާ ފަރިވެލުން ވަސްމީރު ފޮނި މޭވާއައުން
ރަސްކަމެއް ރިޒުޤުގެ ފެށުން ދަސްވާނެ ހޭ ހިތް މަންމަނޭ
މަރުވެފައިވާ ބިންތަކަށް އަހަރެންގެ ރޫޙުން ރޫޙުދީ
މަރުވެގެން މި ދަނީ ކިހައި ހެޔޮކަން މަތީ، ވިސްނައިގަނޭ
ދޫނިތައް ތަސްބީޙަކިޔަނީ ދަނޑުފަނގުން ތަކުބީރު އިވެނީ
މޫނު އަލި ހިތްތައް އެ ރޮއިލީ މި ފަދަ ނާޅިން ދެން މިނޭ