ދެމޫސުން ބެދޭއިރުގައި ނަގައި ދަނޑިފަށް ވަރަށް ދިގުވާނެ
އެނޫން މޫސުން ތަކަށްވުރެ ކަނޑުގެ އޮއެވަރު މާބޮޑަށް ގަދަވާނެ
ޖެހޭވައިގާ ދަމާ ވަ ވޮޔާ ދިމާ އިދިމަތި ކަނޑުގެ ރާޅާ
އެނގޭ މޮޅު ކެޔޮޅަކަށް ނޫނީ ދެވޭ މިސްރާބުވެސް އޮޅިދާނެ
އުތުރު ކާލާ ދެކުނު ކާލާ ދެ މުރިނގާ އަދި ގަހާ ތަރިޔާ
އުޑުގެތަރިޔާ ނަކަތް ނޭނގޭ ކެޔޮޅު ލައިގެން ފުރަން ނުމެވާނެ
ކަނޑަށްދަތުރަކު ފުރާއިރުގައި ބަލަންވީ ކަންކަމަށް ނުބަލައި
ނަގަން އެކިވަރު ރިޔާނެތްނަމަ އަމާން ބަނދަރެއް ނުވެސްހިފިދާނެ
ނަގައި ކޮޅިގަނޑު ހަލާއިރުގައި ޖަހާ ވިއްސާރަދުނި ދަށުގައި
އަރައި ގަދަ ފަދަ ނަގޫ ރޯޅިން ވަޔާ އޮޑިގަނޑު ކެތެއް ނުމެވާ
"ޖަހާ ކެރިބުޑު ދެ މޫސުމުގައި" ގަހާ މުރިނގަށް ބަލައިލީމާ
ނަގާ ކޮޅިގަނޑުގެ ވައި ހުރިވަރު އެނގޭ ކެޔޮޅެއް ކަމަށް ވާންވާނެ
ދިމާ އިދިމަތި ވަޔާއެކުގައި ދެކަނި ހަމަޔަށް އަޅައި ގޮސްފައި
ހިފާ ބަނދަރަށް ފަނާ ލިޔަކަސް ހިފާނެކަމެއް ޔަގީން ނުމެ ވާނެ
ފަނާ ހަރުލައި ގަލެއް ނެތުމުން ކަހާލައިގެން އޮޔާ ދެމެމުން
ނަގަން ރިޔަލެއް ނެތީވިއްޔާ ފަރަށް އޮޑިގަނޑު އަރައިވެސްދާނެ
