ކައު މާތް މުޙަންމަދު މުޞްޠަފާގެ ވިލާދަތުން – ރައުނަޤުވެލައިފި މި ކައުނު ސާފު ހިދާޔަތުން
ރުޅި މޫނުގައި ވީ ދުނިޔެ ކިބުރުގެ ތަޚްތުގައި – މުޅި ޢާލަމަށް ހީނލައިފި އޭގެ ރިޔާސަތުން
ކުފުރުގެ ނުބައި ހިރަފުސް ވުޖޫދު މި ހަޑިކުރާ – ދެފުށުން ފޮޅަން ފައްޓައިފި ތެދުވެ ޒަމާންއަތުން
އިންސާނިޔަތު ހައިރާންވެ ނުހަނު ސަމާލުގައި – ދިން ކަންފަތެއް، އިއްވައިލި ޚާއްޞަ ބަޝާރަތުން
ހިލަހިލަގަނޑަށް އަޅުވެތިވެފައިވީ އަޅުތަކުން – ދިލެމުން ލޮލާ ހިތް ހުޅުވިލައިފި އެ ދަޢުވަތުން
ކިހިނެއް އޮތީ އަނިޔާގެ ގޮށްމުށުގައި ޒަމާން – އޮހިގެން އައީ އަމްނާއި ސިލްމު ޢަދާލަތުން
ކަނޑިތައް ވަނީ ދަނޑިވަޅަކަށޭހަމަ ބަލަބަލައި – ކެނޑުމަށް އެ ހުރި ބޯތައް ފަހުންވި ސަލާމަތުން
ކުލަޔާ ޤަބީލާޔަށް ފަޚްރުވެރިވުން ކޮބާ؟ – އިލައެއް ފަދައިން އަޅިޔަށް އެ ވެއްޖެ އިސާހިތުން
ދިރިތިއްބައޭ އަންހެންދަރީން ވަޅުލީ ހެމުން – ކުރި ކުށް މަނާވެވި ޙައްޤު ދީފި ޟަމާނަތުން
ދޮން އަނގުރު އަލިފާން އަނދައަނދާހުރި ހިތްތަކުން – ފުން ވިންދުތައް ލޯބިން ޖަހައިފި އުޚުއްވަތުން
ފެންކަޅިވެ ލޯތައް ދެން ރަޙްމު ދިރިގެން އައިސް – އެންމެންގެ ނަފްސު ފުރައިފި ސާފު މުޙައްބަތުން
މި ބިމާ ފަޒާ މުޅި ކާއިނާތު މި އުފަލުގައި – ތިބެ އިއްވަނީ ޞަލަވާތް ސަލާމެ ދެތުންފަތުން
