ރަޙްމަތުން ފުރިގެންމިވާ ރަމަޟާންމަހުގެ މަތިވެރިރެޔެއް
އަޅުކަމެއް ކުޅަނަމަ އެރޭ ހާހުން ދަރުމަ ދެއްވާ ރެޔެއް

ލައިލަތުލްޤަދުރުގެ ނަމުން ޤުރުއާނުގައި އެންގެވިރެޔެއް
ސޫރަތުލްޤަދުރުން އެކަން ސާބިތުވެ އެނގިގެންވާރެޔެއް

ރޯދަމަހު ފަހުދިހަތެރޭން އޮނަހިރި ރެޔެއްކަމުގައިވަނީ
ހޯދުމަށް އެހެނަސް އެރޭ، ކަނޑައެޅި އެނގެންވެސް ނެތްރެޔެއް

އެންމެމާތް ޤުރްއާން ބާވާލެއްވިރޭކަން އަންގަވާ،
އެންމެ ބަރާތްތެރި ރެޔެއްކަމުގައި އެރޭ ، ލެއްވެވިރެޔެއް

އަންނަ އޮނަހިރި ރޭތަކުންވެސް ކޮންރެޔެއްކަން އެރެޔަކީ
"ޖައްލަރައްބީ އަޅަމެނަށްމީ ކަޝްފުކޮށް ދެއްވެވި" ރެޔެއް

ސިއްރު ދެނެވޮޑިގެންވަނީ ﷲ ޖައްލަ ޖަލާލުހޫ
ހިތްތަކުން ޤުރްބާންވުމަށް ތަޤްވާގެ މަގުގައި މޮޅު ރެޔެއް

ފަޖުރުލައްޖައުމާއި ހަމަޔަށް މާތްވި ޖިބްރީލުލްއަމީން،
އަރިހުގައި އެތަކެއް މަލާއިކަތުން މިބިމުގައިވާ ރެޔެއް

މުއުމިނުންގެ ދުޢާތަކާ ތަސްބީޙަ ތަހުލީލުގެ ތެރޭން
"މުއުމިނުންނާއެކު މަލާއިކަތުން އެކީގައިވާ" ރެޔެއް

ރަޙްމަތާ ބަރަކާތް އަދައިގެން އަޅުކަމެއް ކުޅަނަމަ އެރޭ
އަޅުތަކުން ކުޅަ އަޅުކަމަށް ހާހުން ދަރުމަ ދެއްވާ ރެޔެއް

ފާފަފުއްސެވުމަށް އެރޭ ކުރެވޭ ދުޢާ ރޫޙީ ގޮތުން
ޚާއްސަކޮށް އެއްހާސް މަހާ އެއްވަރު ސަވާބު ލިބޭ ރެޔެއް

މުއުމިނުންގެ ދުޢާތަކާ ތަސްބީޙަ ތަހުލީލުގެ ތެރެއިން
މުއުމިނުން ކުޅަ ކުށްތަކަށް ތައުބާވުމަށް މަތިވެރި ރެޔެއް

ފުރުޞަތެއް މީ އަހަރަކުން އެއްފަހަރު ރަމަޟާންމަހު ލިބޭ
ޤުދްރަތުގެ ރަޙްމަތް އަދައިގެން ދޫނުކޮށްލަންވީ ރެޔެއް

ދޫނުކޮށް އަޅުކަން ކުރާށޭ ރޯދަމަހު ފަހު ދިހަތެރޭގައި
ދޫނުކުޅަނަމައީ! ދިމާވާނޭ އެއިން ހަމަ، އެއް ރެޔެއް