ގައުމަށް ލޯތްބާ މަދަދާ ދޭން ގައުމުގެ ފަރުދުން ތެދުވާށޭ
ގައުމީޖޯޝާ ފޯރީގައި އެންމެން ގުޅި ހިންދެމިލާށޭ

ނަފުރަތުގެ ހުތުރު ލަޓިބުރިތައް ދެއަތުން ބިންދާ މުގުރާށޭ
އަފުރާދުން ތިޔަ ދަހިވެތިވީ ޚަންޖަރު ތިރިކޮށް ވަޅުލާށޭ
ސަފުތައް ޖަދަލުގެ އަތުރައިގެން ފަހަތުން ތިޔަހެން ނުދުވާށޭ

ބިމަކީ އެންމެތަކުންގެ ބިމޭ ބުންޏަސް މިހަނދާން ފުހެވިއްޖޭ
ބިމުގައި އިހު އޮތް އެކުވެރިކަން ގުޅުމާ ކުލުނާ ގެއްލިއްޖޭ
އިމުގައި ސާބިތު މަސަލަސްކަން ކުރުމަށް އެންމެން ވިސްނާށޭ

ތަޅަމުން ފޮޅަމުން ދާނަމައީ ބޭރުގެ ބާރެއް ވަދެދާނޭ
ތަނުގައި ވަކިތައް ހިއްޕާލައި މިވެހިން ގެދޮރުން ނެރެފާނޭ
މޮޔަކަން ތިޔަހުރި ދޫކޮށްފާ ހޭވެރިކަމުގައި ތެދުވާށޭ

ދައުރެއް ފެށުމުން، ނިމިގެންދާ ދައުރަށް ބަދުބަސް ނުބުނާށޭ
ތައުހީނާ ހަޑިހުތުރުބަހުން އަޑުތައް އުފުލަން ނުހަދާށޭ
ތަޢުރީފުން އަޅެ އެންމެ ބަހެއް ނަމަވެސް ދެވެރިން ބުނެލާށޭ

ލީ ލަކުނެއް ނަމަ ދުލުގެ ކަނޑިން ނުފިލާ އަބަދަށް ހުންނާނޭ
ވީ ފާރެއް ނަމަ އުންޑައަކުން ހީވޭ ހިކިގެން ފުހިދާނޭ
ވީމާ ތިޔަހެން މީރުފެނަށް ޒަހަރާ ވިހަޔާ ނާޅާށޭ

ދެމެދުގެ ހުރަހެއް ހުރި ހުރިހާ ތިރިކޮށް ވެއްޔާ މޮޑެލާށޭ
ދެމެދުން ފަހި ވައިރޯޅި ހިނގާ ޖެހުމުގެ ފުރުސަތު އޮތަދޭށޭ
މެހިގެން ގައުމާ އެކު ދީން އެދެވޭ ކުޅިފަސް ހޯދާށޭ