ލަންކާގެ މުހިންމު އިދިކޮޅު ސިޔާސީ ލީޑަރެއް ކަމަށްވާ ލަސަންތަ ވިކްރަމަސޭކަރަ (ފޮޓޯ) މިއަދު އޭނާގެ އޮފީސް ތެރޭގައި ހުއްޓައި ބަޑިޖަހައި މަރައިލައިފިއެވެ. މިއީ ރައީސް އަނުރަ ކުމަރަ ޑިސަނަޔަކަ މި ދިޔަ އަހަރު ސަރުކާރާ ހަވާލުވެ ވަޑައިގަތް ފަހުން ލަންކާގައި ސިޔާސީ މީހަކު މަރައިލި ފުރަތަމަ ފަހަރެވެ.
ލަންކާގެ ދެކުނު އައްސޭރިފަށުގައި އޮންނަ ވެލިގަމަ ޓައުންގެ ސިނާއީ ކައުންސިލްގެ ޗެއާމަންކަން ކުރައްވައި އުމުރުން 38 އަހަރުގެ ލަސަންތަ ހުރީ ވެލިގަމަގެ ރައްޔިތުންނާ ބައްދަލު ކުރުމުގައެވެ. ބަޑިޖެހި މީހާ ކުއްލިއަކަށް އޮފީހަށް ވަދެ ފިސްތޯލައަކުން އެތައް ފަހަރަކު ވަޒަން ޖަހައިފައި ފިލައިގެން ދިޔައީއެވެ.
މި ހާދިސާގައި އިތުރު މީހަކަށް ގެއްލުމެއް ނުލިބެއެވެ.
ލަސަންތަ މަރައިލި ސަބަބު އަދި ހޯދިފައެއް ނުވެއެވެ.
"ގާތިލު ހޯދުމަށް ތަހުގީގެއް ފަށައިގެން ކުރިއަށް އެބަގެންދަން،" ފުލުހުން ނެރުނު ބަޔާނެއްގައި ބުންޏެވެ.
ލަސަންތަ މަރައިލައިފައި މި ވަނީ ވެލިގަމަ ސިނާއީ ކައުންސިލްގެ ބާރު ހޯދުމަށް އޭނާގެ ޕާޓީ އާއި ވެރިކަން ކުރާ ޕާޓީއާ ދެމެދު ވާދަވެރިކަމެއް ހިނގަމުން ދަނިކޮށެވެ. އަދި އަނިޔާވެރި ކުށްތައް ވެސް ގައުމީ ފެންވަރުގައި އިތުރުވެފައި ވަނިކޮށެވެ.
ލަސަންތަ މަރައިލުމުން ލަންކާގައި ގާނޫނާއި ގަވައިދު އޮތް ހާލަތާމެދު ސީރިއަސް ގޮތެއްގައި ކަންބޮޑުވުން ވަނީ އުފެދިފައެވެ.
advertisment
