ކޮންމެ ކަޅުރެއަކަށް ނިމުން އަލިފަތިހަކުން އަންނާނެޔޭ
ކޮންމެ ހާލެއްވެސް ބަދަލުވާ ހާލަތެއް އޮންނާނެޔޭ
މުގުރަމުންދާ ރާޅު ކަނޑުތައް މަޑު ހިމޭންވެ ތެމާވެފައި
އަނގުރުއަލިފާން ބަދަލު އަޅިއަށް ނުވަތަ ދެއްޔަށް ވާނެޔޭ
މޫދު ފަޅު ވިލު ކަނޑުގެ ދެއިރަށް ބަދަލުވާހިނދު އާޖުފާޖު
ފޫދުމާ ހިކުމާއި ދިޔަވަރު މޫސުމަށް ފެންނާނެޔޭ
ވާރެފެން ގިނަ ވައިވެފައިގަދަ ހުޅަނގު މޫސުމަކަށް ފަހުން
ބާރު އަތްވާ ރޯޅިފަށް މަޑު އިރުވައެއް އަންނާނެޔޭ
ގުލްޝަނަށް މޫސުން ޚަރީފުގެ ހިޔަނިއެޅި ގަސްތައް މިލައި
ގުލަހަޒާރުގެ މާފޮޅޭ މޫސުން ފަހުން އަންނާނެޔޭ
މިއަދު މުއްސަނދިކަމުގެ ތާޖުން ފަޚުރުވެރިވާ މަހުޖަނުން
ދިއަތަނެއް އަތްމަތި ނުއެނގި މާދަން ފަގީރު ވެދާނެޔޭ
ނޫރުކަން ދެލޮލުން ވިދާ ކަށި ނޫ ޒުވާން އުމުރަށްފަހުން
ތޫނުކަން ނެތް ރޫވެ މުސްކުޅި ވާ ދުވަސް އަންނާނެޔޭ
ހިތުގެ ހުތުރުން އިއްޔެ ހަމަލާދިން ހަތުރުވެރި ދުޝްމިނުން
މިތުރަކަށްވެ ބަދަލު ހިމާޔަތްދޭން ފަހުން އުޅެފާނެޔޭ
ބާރުހިންގާ ގޮށްމުށުންނާ ހަންމުށިން ވެސް ލާނިހާ
ޖާއިރުން ނެތި ބާރު ނިކަމެތި ވާ ދުވަސް ފެނިދާނެޔޭ
***
* އީރާނުގެ މިސައިލުތައް އިޒްރޭލުގެ ތެލްއަވީވަށް ފޯރުމުން
އައި ޝުޢޫރެއް.
