އިރާ ހަނދު ތަރިތަކާއި އުޑާ ބިމާ ވެސް ހެއްދެވީ ﷲ
އިރާދަކުރައްވަވައި ކަންކަން ހިނގާ މަގު ލެއްވެވީ ﷲ
މަލުން އޮށްތައް ނެރުއްވާފައި އޮށުން ގަސްތައް ފަޅުއްވާފައި
އަލުން މާތައް އެގަސްގަހުގައި ފޮޅުއްވައިދެއްވަނީ ﷲ
ދެގަސް ހަމަ އެއްބިމުން ފަޅުވައި ދިރުންހަމަ އެއްފެނުން ދެއްވައި
އެގަސް މިގަހާ ތަފާތު ކުރައްވަނީ މަތިވެރިވި މާތް ﷲ
ބައެއް ގަސްގަހުގެފަތް ތުނި އޮމާންކަން މަތީ ލައްވައި
ބައެއްފަތް ބޯ ކުރައްވައި ރާޅު ކުރުވީ ވެސް އެ މާތް ﷲ
ގަހާގެހި މިފަދައިން ލައްވައި ތަފާތުމިނާއި ސިފަދެއްވައި
ވަހާ ކުލަޔާ ޢަދަދު ނުވެވޭ މާ މެލާމެލި ލެއްވެވީ ﷲ
ފަޅައި ޖެހިގެން ދެގަސް ބިމުގައި ހެދޭގޮފިތައް ލާމެހިފައި
އަޅާ މޭވާ އެ ގަސްގަހުގައި ތަފާތު ކުރައްވަނީ ﷲ
އެމޭވާ ހުތްވެފައި ރަހައިން މިމޭވާ ފޮނިވެފައި އެފަދައިން
ދެ މޭވާ މީރުވާ ދެބަޔަކު އުފައްދަވަނީ ވި މާތް ﷲ
ހިރޭ ފަތްތައް ވަޔާ ވިހުރޭ ހިޔާ ފިނިފިނި ބިމަށް ފެތުރޭ
ދިރޭރޯގަސްގަހުން އަލިފާން ނެރުއްވައި ދެއްވަނީ ﷲ
މަހާމެހި ފެނުތެރޭ ލައްވައި ދިރުން އެއްފަދައަކުން ދެއްވައި
ވަހާ ރަހަޔާ މަހުގެ ސިފަޔާ ބަދަލުތައް ލެއްވެވީ ﷲ
ބައެއް މަސް ކެއުމަކަށް ލައްވައި ރަހައިގާ މީރުކަން ދެއްވައި
ބައެއް މަސް ވިހަތަކުން ފުރުވައި މަރެއް ފަދަ ލެއްވެވީ ﷲ
އުފެއްދެވިހާ ނަބާތާތާ މިފެންނަ އެތައް ޖަމާދާތާ
ނުފެންނަ ތަފާތު ޒާތްޒާތާ އުފައްދަވަނީ އެ މާތް ﷲ
ޕަރިންދޭ އުދުހެހުން މި ގޮވާ ދަރިންދޭ މިނިކަމުން މި ދުވާ
ވަރިންދޭ ވަރި އުފަން ކުރުވައި އިރާދައިން ހިންގަވާ ﷲ
ފެނުން އާވީގެ އައި ފެށިގެން އުފެއްދި ވިލާ ބަދަލު ވެވިގެން
ފެނުން ފިނިފިނި އަލުން ވެހިގެން ދިރުންތައް ދެއްވަނީ ﷲ
ދަނޑުގެ ގަސްތައް ވެހޭވާރޭން ތަރޯތާޒާ ވެގެން ހެދުނަސް
ކަނޑުގެ ލޮނުރަހަ އެ ފެންވެހުނަސް ބަދަލުނުކުރައްވަނީ ﷲ
ލިބޭ އިރުގާ ކަނޑުން ލޮނުފެން ބޮވޭހެން މީރު ކޯރުގެ ފެން
ވިބޭނުންތެރި މަގުން ލެއްވީ އެފަދަ މިޘްލެއް ނުވާ ﷲ
އުފެއްދެވި ވައްތަރާ ސިފަޔާ ބަލާބެލުމަށް ތަފާތު ނުވާ
އުފެއްދެވި ބިސްބިހުން ވަކިކޮށް ދެޖިންސު ނެރުއްވަނީ ﷲ
މި ނަސްލުގެ ފެށުމަކަށް ވެއްޔާ ކިސަޑު މަންޓާއި އިންސާނީ
ވިޔަސް ހަށިތައް ތަފާތު ނެރުއްވަނީ ދަރިކޮޅުތަކުން ﷲ
ވުޖޫދުގެ ޢާލަމުން ފެނިދާ ފެށުންތައް ފެށި ނިމޭ ގޮތުގައި
ރުޖޫޢަ ތިމާގެ ފެށުމަށް ވާނެ ހެކިތައް ލެއްވެވީ ﷲ
އަމުރުފުޅު އަންނަ ހިނދުގައި"ކުން" އަމުރުފުޅު އައި ގޮތަށް "ފަޔަކޫން"
އަމުރުފުޅު ހިންގަވާ ކަމަކީ އަމުރުފުޅު ތަކުގެ ވެރި ﷲ
