ކުޑަކުދިންނީ އުންމަތުގެ ލޮބުވެތިވި ނިޔަނެތިވީ ހިތޭ
ކުޑަކުދިންނީ ނޫރެ ވަޠަނީ އަލި ވިދާ އަގުހުރި މުތޭ
ޖިންސަކަށް އަދި ކުލަޔަކަށް ހުރި އުންޏަކަށް ބެލުމެއް ނެތޭ
ދަންނަވަންތޯއޭ އެއީ ﷲދެއްވެވި ނިއުމަތޭ
އަޑު ލަމުން މާ ބާރު ބާރަށް ބަސް ބުނާނެ ކަމެއް ނެތޭ
މަޑުމަޑުން ލޯބިން ބުނާށޭ ބަސް އަހާނެ އެއީ ގޮތޭ
ބަސްތަކުން ނުގުޅޭ، ކުދިންނަށް ތަދު ކުރާނެ ކަމެއް ނެތޭ
ބަސްތަކާ އަމަލުން އުފާދޭށޭ އެއީ ހުސް ރަހުމަތޭ
މައިންބަފައިގެ އުފާތަކޭ ދެލޮލާއި ހިތުގެވި އުލްފަތޭ
ގައިމު ލޮބުވެތިވީ ދަރިންނީ ހިތްތަކުގެ ފިނި ޖަންނަތޭ
އިއްޔެ ދުށް ބަޠަލުން ފަދައިން ދައްކާނެ ސިފައީ ހުރުމަތޭ
ދިއްލަމުން އުންމީދުތައް ގައުމަށް ކުރާނީ ޚިދުމަތޭ
އިލްމުގައި ކުރިޔަށް އަރައި އިލްމާ ފުނޫނުގެ އަލި މުތޭ
އިލްމުވެރި އެކި ފަންނުގައި އެ ކުދިން ލިޔާނީ ހުސް ފޮތޭ
އެކި ރޮނގުން އުފަލާއެކީ އެކުދިން ކުރާނީ މިންނަތޭ
އެކި ވަރުގެ އެކިއެކި މަގާމުން ނަންވިދާ ވަރު ހިންމަތޭ
ޖައުހަރޭ އަގުހުރި އެއީ ގައުމާއި ވަޠަނުގެ ގުއްވަތޭ
މައުމަލޭ ތާޒާ ފޮޅޭ ވަޠަނުގެ ހަގީގީ އިއްޒަތޭ
ކުޑަކުދިންނީ ރޫޙެ ވަޠަނީ އަގު އަރާނެ ޝަރާފަތޭ
ކުޑަކުދިންނީ އުންމަތުގެ ގަދަރާއި މާތްވި ކަރާމަތޭ
ކުޑަކުދިންނީ ވިންދު ގައުމުގެ ލޭހިނގާނެ ހިމާޔަތޭ
ކުޑަކުދިންނީ ސުލްހަޔާ އަދުލުގެ ނިޝާނެ ހިދާޔަތޭ
