ވެލާނާ އިންޓަނޭޝަނަލް އެއާޕޯޓްގައި މިދިޔަ ހޯމަ ދުވަހު ހަވީރު ހިނގި އަލިފާނުގެ ހާދިސާގައި ފިހުނު އެމްއޭސީއެލްގެ މުވައްޒަފަށް އައިސުޔޫގައި ފަރުވާ ދެމުން ގެންދަނިކޮށް މިއަދު މަރުވެއްޖެ އެވެ.
އައިޖީއެމްއެޗްގެ މީޑިއާ އޮފިޝަލް ވިދާޅުވީ އެ ހާދިސާގައި ފިހުނު އުމުރުން 46 އަހަރުގެ އިސްމާއިލް ރަޝީދު (ދޮން އިއްސެ) ނިޔާވީ އައިސީޔޫގައި ފަރުވާދެމުން ގެންދަނިކޮށް މިއަދު 2:30 އެހާކަންހާއިރު ކަމަށެެވެ. އެ ހާދިސާގައި އޭނާގެ ހަށިގަނޑުގެ 83 ޕަސަންޓު ވަނީ މުޅިން ފިހިފަ އެވެ.
މި އަލިފާނުގެ ހާދިސާ ހިނގި ގޮތުގެ ތަހްގީގު އެމްއޭސީއެލް އިން ވަނީ ފަށައިފަ އެވެ. ނަމަވެސް އަދި މިހަތާނަށް ހާދިސާ ހިނގި ގޮތުގެ ތަފްސީލް ރިޕޯޓް ލިބިފައިނުވާ ކަމަށް އެމްއޭސީއެލުން ބުންޏެވެ.
އިސްމާއިލް ރަޝީދުގެ ޖަނާޒާ އޮންނާނީ މިއަދު ހަވީރު 5.30 ގައި އާސަހަރާގަ އެވެ.
މިހާދިސާ ހިނގަން މެދުވެރިވީ އެއާ ޓެކްސީތަކަށް ތެޔޮއަޅާ ޓޭންކްތައް ބަހައްޓާފައި ހުންނަ ސަރަހައްދާ ކައިރީގައި ތެޔޮހޮޅިއެއް ވެލްޑް ކުރުމުގެ މަސައްކަތް ކުރަމުން ދަނިކޮށެވެ.