ޚިޔާލުތައް ތަފާތުވުން ޚިލާފަކަށް ނުހައްދަވާ
ކިޔާ މަގުން ބިނާކުރަން ގިރާ ހުރަސް ކުރައްވަވާ
ފާޅުކުރަން ޚިޔާލުތައް ހާމަކުރަން ޝުޢޫރުތައް
ވާހަކަދައްކަވާ ވަގުތު ރާގު ރިވެތި ކުރައްވަވާ
ފާޑުކިޔުން ރަނގަޅު ކަމެއް އާޑަކިޔުން ހުތުރު ކަމެއް
ދާނޑުމަތީ އޮތަސް ތިހެން އައިބު ބަހުން ނުމޮށްޓަވާ
ރަސްމަތި ދޫފުޅުން ނަޔަސް މަސްވެރި އަނގަޔަކުން އަޔަސް
ބަސް ހެޔޮނަމަ އަހާ ހިފަން ގަސްދު ރަނގަޅު ކުރައްވަވާ
ޖެހި ދަނޑިބުރި އަތުން ހިފާ ބެހިލާން ޖެހުނަތީ ހިތާ
ކެހިދޭން އުޅެވިދާނެތާ އެހެނަސް ވަޅި ނުނަންގަވާ
އެދިމާވެސް ބަލާ ފަދައިން މިދިމާ ވެސް ބަލާ ހަދައި
ދެދިމާ އަށް އަޅާކިޔައި ތެދުބަސް ދެން ބުނުއްވަވާ
ވާނަމަ ދަތި ތުރާތަކާ ދާނަމަ ނެތި އަމާންކަމާ
ޒާތީގޮތް ހިފަންޏަކާ ޕާޓީތައް ނުހައްދަވާ
ވެރިވެތި ނެތް ސުލޫކުގައި ގެރި ބަކަރީ އުސޫލުގައި
ވެރިކަން ބޭނުމަސް ތިބާ އެރިދާނޭ ނުހިއްތަވާ
ކުށްވެރި ވެއްޖެ މީހަކަށް ކުށްވެރިކަމުގެ ނިސްބަތަށް
ކުށް ކޮށްގެން ލިބޭ ސަޒާ ކުށް ކަމުގައި ނުބައްލަވާ
ޙައްޤު ތަށަށް އެދޭމެހެން ޙައްޤު މަށަށް ލިބޭނެހެން
ރައްދު ނުދޭ އުޞޫލަކުން ޙައްޤު ތުޅުން ކިރުއްވަވާ
މުންކިރުވާ އަޚަށް ޓަކައި ރުންކުރު ދެން ތިބާ ވެފައި
ދުންދެކަރާސް ލިބެން އޮތަސް އުންކާރަށް ނުހިއްޕަވާ
ހެޔޮބަނދަރަށް އަމާޒުކޮށް ހެޔޮދަތުރެއް ޚިޔާރު ކޮށް
ހެޔޮމަގު ދަންނަހާ ރަނގަޅު ކެޔޮޅުން މަތި ކުރައްވަވާ
ރާއްޖެ ދެކޭ ސަގާފަތާ ބާއްޖަވެރިވި ކަރާމަތާ
މާއްދިޔަތުގެ އެދުމުގައި ދާން ދުލެއް ނުދެއްވަވާ