ހުޝިޔާރުވާށޭ އޭބޮލާ ލޮބުވެތި އެހެން ގުނަވަންތަކަށް
ކަސިޔާރުވީމާ ހަމަތަކުން ހުށަހޮޅިދެއޭ މައްސަލަތަކަށް
އަތްފައި ނުރައްކާ ހާލަތަށް ތައްޔާރުވާން އަރަނީ ހިތަށް
ބައްޔާއި ފަރުވާ ނުގުޅުމުން ކެތްނުވެގެނޭ އުނދަގޫތަކަށް
މަސަލަސް ނުވާ ކާނާތަކުން ދުލަކަށް އެކަނި ލައްޒަތު އެދޭ
ހަސަދައިގެ ލޭ ކެކި ހޫނުވޭ ބިރުވެރި ނުރައްކާ ޒާތަކަށް
ބެރަކާ ޖަހާ ލަވަޔާ ކިޔާ ނުގުޅޭ ސަމާގައި އަތްޖަހައި
ކޮރުލާން ވެޔޭ އުނދަގޫ ނަށާ މީހާ އެދޭހާ ބަނޑިތަކަށް
ކަށްބިންތެރޭގައި ވިނަކަމުން ތެޅުމުން ދެގެރި ރުޅިގަދަވެގެން
ޝައްކެއް ނެތޭ ގެއްލުން ވެފާ ބާރެއް ކުރޭ ކަށްގާތަކަށް
ޣިޔަރަތުގެ ފުން މާކަނޑުތަކުން ދިޔަވަރު އުފައްދާ އޮއިވަރުން
ކިޔަމަންނުވާ ބޮޑު ރާޅުތައް ބިންދާނެއޭ ގޮނޑުދޮށްތަކަށް
ހައްގުގެ ދެލޯ ހުރެއޭ ބަލަން ކަންއޮތްގޮތާ ކަންވާގޮތާ
ހައްދެއް ނެތީމާ އެދުމުގާ ލޯ އެނބުރެއޭ އާމަގުތަކަށް
ނުރުހުންވުމުން މުންކިރުވެފާ ހުރުމަތް ކަނޑާ ހަސްތީގެ ވާ
ކުރުމުން ތަޙައްދީ އަނެކަކަށް މަގުފަހިވެޔޭ ހަމަލާތަކަށް
ކަތިފިޔަވަޅަށް ހިތްހޭލަނީ ހަތިޔާރުގާ އަތްބީހެނީ
ދަތިތައް ކުރާ އާދޭހުގައި ލުއި އެދިގެނޭ ކަސްތަޅުތަކަށް