ކަރުނަތައް ރަތްލޭގެ އޮހޮރޭ ދެލޮލަކުން ނިމުމެއް ނެތޭ
މަރުގެ ދުންމާރީގެ އަޑުފަށް ރަށުތެރޭން ކެނޑުމެއް ނެތޭ
އޮއްސުނަސްއިރު އުދަވިޔަސްހަނދު މެންދުރަސް އަދި މެންދަމަސް
އޮއްސަމުންދާ ބޮމުގެ ވާރޭ ތުނިވެލާ ވަގުތެއް ނެތޭ
އެއްގަމުން ހަމަލައިގެ ޠޫފާނީ ވަޔާއި ބުރުއްސަމުން
އަންނަ އަލިފާނީ ވަޒަންތައް ހައިވެލާ މިނެޓެއް ނެތޭ
ތުއްތު ފެންކަޅިލޯތަކާ ބިރުވެރި ލެވޭ ނޭވާތަކާ
ހުއްޓުވަން މަންމަގެ އޮހޭ ލޭކަރުނަ ނޫން މަދަދެއް ނެތޭ
ކުކުރުމާ ރުއިމާއި މަންމަގެ ނުކުޅެދޭ ހާލަށް ޓަކައި
ފިކުރުވެރި ބައްޕާގެ މާޔޫސީ މެނޫން ބޭހެއް ނެތޭ
ރަށުގެ އުސް ތިރި ކުދި ބޮޑެތި ފުނޑުފުނޑުވެދާއިރު ތައް ބިނާ
ދަށުވެގެން މަރުވުން މެނޫން ލިބިދޭ ހިމާޔާތެއް ނެތޭ
ލޭގެވާދީއެއް ފަލަސްޠީނުގެ ބިމުން ދެމިގެންފިޔޭ
އޭގެ އަގު ދެއްކޭނެ މާއްދީ ފޯރުމެއް ދުނިޔޭން ނެތޭ
ޒަހަރު ހިތި މުޅި ރަށުތެރަށް ހީވޭ ފެތުރިފާހެން އޮތީ
ސަހަރުގައި ފަރުވާއަކަށް ހުސް ކަރުނަ ނޫނިއްޔާ ނެތޭ
ހާލަތާ އެކުވެސް މުޖާހިދު ހިތްތަކުގެ މުޅި ވިންދުގައި
ކާމިޔާބުގެ މީރު ރަހަ ނޫން ރާހަތެއް އަމުދުން ނެތޭ
ދުޝްމިނީ ހަމަލާތަކަށް ދޭ، ރައްދު ދޭން ކެރި ފޯރިއަސް
މުސްލިމީ ދައުލަތްތަކަށް "މިނިވަންކަމެއް" މަހިތުން ނެތޭ
ޣަފުލަތުގެ ތަންމަތިތަކަށް އެތިބީ އަޚުން ހުރިހައި އަރާ
ނަފުރަތުގެ މިޖެހޭ ޑަނޑޫރާތައް މެނޫން ދެއަޑެއް ނެތޭ
ހެޔޮ އަމާން ދުވަހެއް މިއަށްވުރެ ދައްކަވާނދޭ ربنا
ހެޔޮދުޢާ ނޫނީ ނެގޭނެ ސިލޭހައެއް އަތުގާ ނެތޭ
