ވެލާނާ އިންޓަނޭޝަނަލް އެއާޕޯޓްގައި އިއްޔެ ހިނގި އަލިފާނުގެ ހާދިސާގައި ފިހުނު އެމްއޭސީއެލްގެ މުވައްޒަފުގެ ހަށިގަނޑުގެ 83 ޕަސެންޓް ފިހިފައިވާ ކަމަށް އައިޖީއެމްއެޗުން ބުނެފި އެވެ.
އައިޖީއެމްއެޗްގެ މީޑިއާ އޮފިޝަލް އަދިވެސް އަށް މައުލޫމާތު ދެއްވަމުން ވިދާޅުވީ 46 އަހަރުގެ އެ ފިރިހެން މީހާ ރޭގެ ވަގުތެއްގައި އައިސީޔޫއަށް ބަދަލުކޮށް ފަރުވާދެމުން އަންނަ ކަމަށާއި އޭނާ ހަށިގަނޑުގެ 83 ޕަސެންޓް ވަރަށް ބޮޑަށް ފިހިފައިވާ ކަމަށެވެ.
އައެމްއޭސީއެލުން ބުނެފައި ވަނީ އިއްޔެ އިރުއޮއްސުނުއިރު މި އަލިފާނުގެ ހާދިސާ ހިނގި ގޮތުގެ ތަހްގީގު ފަށައިފައިވާ އެވެ.
އަދިވެސް އަށް މައުލޫމާތު ލިބިފައިވާ ގޮތުގައި މިހާދިސާ ހިނގަން މެދުވެރިވީ އެއާ ޓެކްސީތަކަށް ތެޔޮއަޅާ ޓޭންކްތައް ބަހައްޓާފައި ހުންނަ ސަރަހައްދާ ކައިރީގައި ތެޔޮހޮޅިއެއް ވެލްޑް ކުރުމުގެ މަސައްކަތް ކުރަމުން ދަނިކޮށެވެ. އަދި މި ހާދިސާގައި ފިހުނީ ވެލްޑް ކުރަން އިން އެމްއޭސީއެލްގެ މުވައްޒަފެކެވެ.