ގައުމީދުވަސް މިގެންނަނީ ގައުމުގެ ހަޔާތް ބަޔާންކުރާން
ގައުމީދަރީންގެ ހިތްތަކުން އާލާ އަޒުމު އަލުން ކުރާން
އަހަރެއްގެ ދިޔަ ކުރިން އަހަރު ފަހަރެއްގެ އައި އެތައް ފަހަރު
ޒަހަރުން ގެނައި ހިތަށް އަސަރު ފަހުތިބި ދަރީން ވަޒަންކުރާން
އެކި މޫސުމަށް އެއައި އަމާން އެކި ޝަޚުސު މޮޅު ގެނައި އޮމާން
އެކި ކުލަތަކުން ފެވޭ ޒަމާން ދެކެފައި އަލުން އުފާކުރާން
ދަރުމައިން އެ ދަރުމަވަންތަ މާތް ދެއްވެވި ރަދުންގެ ދަރުމަޔާ
ބަރަކާތުގައި އެ ބަރުބަރީ ފަރުމާ ގެނައި އަމާންކުރާން
ލޭގައި ހިނގާލި ހޫނަކާ އޭގައި ފަވާލި ރަތްކަމާ
މޭގައި ޢަލީގެ ހުރި ދިރުން ދޭ ހިއްވަރަށް ގަދަރުކުރާން
އަނދިރީގެ ކަޅު އަނދިރިކަމުން ކަޅުކޮށްލި ހިނދު މިބިން އަލުން
ކަނދިލީގެ ރީތި ރަންއަލިން އަލިކޮށްލިގޮތް ހަނދާންކުރާން
ބަޠަލުންގެ ބަޠަލު އުންމަތީ ޣާޒީރަދުންގެ ނަންމަތީ
ގަތަމުން މަލާއި ރަންމުތީ ހާރެއް ރިވެތި ވެދުންކުރާން
ބާޒީގެ ތަށި ގެނައި ގޮތުން ޣާޒީހަސަންގެ ހިކުމަތުން
އާޖިޒުވި ހިތްތަކުން އޮހޭ ތާރީފުތައް އަރިސްކުރާން
ހުރަވީގެ ފަރި އަދާތަކުން އިސްކަންދަރީ ނިޝާންތަކުން
ކުރަހާލި ރަންފޮޓޯތަކަށް ކުރުނީސް ހިތުން އަދާކުރާން
ތިންވަނަ ދުވަހު ނޮވެންބަރުން އައްޑިހަ އަށެއް ކަލަންޑަރުން
ދިން ހަމަލައިން އެދަންވަރުން މިންޖުވިގޮތަށް ފިކުރުކުރާން
ބުންވަރު ނެރޭށަ ފާޅުގައި އުންމީދަކާއި އަޒުމުގައި
ކުންނަށް ހިފާ އަމާޒުގައި އުންމަތް ދިވެހި ބިނާކުރާން
