ކޮންމެ ފުރުސަތަކީ އިލާހީ ދެއްވަވާ ހެޔޮރަޙްމަތެއް
ކޮންމެ ހާލަތަކަށް ޝުކުރުވެރިވުން މެ ނޫން ނެތް މޮޅުގޮތެއް
ލިބުނު ވޭހޭ ފިނިކަމެއް ގަދަ ބާރަކުން އަނިޔާއަކުން
އިބުރަތާ ދަރުސުގެ މެ ނޫނީ ނެތް ހިނގާ ވަކި ސާއަތެއް
ދެއްވުމާއި ނުދެއްވުމާ އަދި ގެންދެވުން ތިއްބާ ބަލަން
ލެއްވިގެންވާ އިމްތިޙާނުގެ ދެއްވަވާ އޭ ފުރުސަތެއް
ބައްސަވައިދެއްވީ ރިޒުޤު މަތިވެރި އިލާހީ ޙިކުމަތުން
ދަސްކުރަން ކެތްތެރި ވުމަށް ބުނެދޭ ވެއޭ މަތިވެރި ފޮތެއް
ވާރެއާ އަތްވާއި ފިންޏާ ހޫނު ތާސީރުން ބިމަށް
ބާރެކޭ ދިރުމެއްގެ އޭ ދެއްވާ ވަރަށް ބޮޑު ނިޢުމަތެއް
ހާލުގައި ބަލިދާނުގައި އޮތުމުން ފިކުރު ދާ އުފުލެމުން
އާލަމަށް އައި މަގުތަކާ ހަމައަށް ވެޔޭ ފޯރާ ގޮތެއް
ސިއްހަތާ ދުޅަހެޔޮކަމާ ތަނަވަސްކަމާ ހިތްފަހިކަމީ
ހިއްސުތައް ހެޔޮ ޝުކުރުގައި ތަސްލީމުވާންވީ ހާލަތެއް
ވެރިކަމެއް މަތިވެއްޖެ ނަމަ ބިރުވެތިވުމޭ ޙައްޤަށް އޮތީ
މެރިދެލޯ ދާއިރު އެދޭނަމަ ދަރުމަވެރިވީ ރާޙަތެއް
ބިންމަތީ ގުންފައިޖަހާ ގުނަވަންތަކުން އިސްރާފުކޮށް
ނިންމި ނަމައީ ތިޔަ ހަޔާތް އުފުލަން ޖެހޭނޭ ޚުސްރަތެއް