ދެކިލާށަ ކުރިމަގު ކޮށްލަފާ މިޚިޔާލު ދަތުރެއް ކޮށްލަނީ
ފިކުރުގެ ސަވާރީގައި ނަގާ ދީލާ ސިކުނޑި ފަހިކޮށްލަނީ
ވައިރޯޅި އުތުރުން ފިރުމަމުން އައިބާރުގާ މަކަރުން ހެމުން
ހައިރާނުގާ ލޯމެރިލުމުން ހައިޖާންތަކޭ ވީ ފެންނަނީ
އިހުމާލުވީ މޫސުންތަކާ ބޭކާރު ކުރި ފުރުސަތުތަކާ
ރިހުމާ ތަދުން އޮތް ވެރިވެފާ މިހިތަށް ހަނދާންތައް ގެންނަަނީ
ކެޔޮޅުންގެ ހަރުލުން ނެތްކަމުން ފައި މަޅުމަތިން ކައްސާލުމުން
ތެޔޮހަންއެދިޔަ ގުނަވަންތަކުން ކަރުނައިގެ ރަތްލޭ އަންނަނީ
އަގަލާއި ސަރަމާ ވެސް ނުލާ މަޖަލާ އެޖެހި ސަކަރާތުގައި
ލަގަނާ އަހާ ވެސް ދޫވެފާ އަނދަވަޅު އަތުން ތިބެ ކޮންނަނީ
މުދަލާއި ގެދޮރާ ލޯބިވާ އަހުރެންގެ މިލްކާ އިންތަކާ
އުދަބާނިތަކުގައި ޚާއިނީ ޅަދަށަށް އެހެރަގެން ވަންނަނީ
ތަކުރާރުވާ ނިކަމެތިކަމާ އެކުގާ އެވާ ބިރުވެރިކަމާ
ޅަކުދީންގެ ގަހަނާ ކަރުގިލޭ ތަކުގައި ރިހުން ގަދަ ހުންނަނީ
އާބާދު ކުރިހާ ކާބަފައިން ބާޒާރުތައް ހުރިހާ ނަފައިން
އާ ތާޖިރުން ވީ ބޭވަފައިން މާޒީގެ އަތްފައި ބަންނަނީ
ހިކިފަސްމަތީ ތިބެވޭނެހޭ މިހިތަށް ވަކިން ކެތްވާނެހޭ
ވިކިފައި ނަފުސު ވެސް ވާކަމޭ ހަކިބައިގެ ލޯތައް ދަންނަނީ
މީ ދަތުރުގައި މި ޚިޔާލުކުރި މަންޒަރުތަކޭ ލޯ ފާރުކުރި
ވީދައިފިޔޭ މިހިތާ މެޔާ ސައިލޭ ލެއިން ދެމިގަންނަނީ
