ދިވެހީންނަކީ ގޮތްހުރި ބައެއް އަޚުލާޤު ރީތި ރަނގަޅު ބައެއް
ކިޔަމަން ހިމޭން މައިތިރި ބައެއް ނިޔަނެތިކަމެއްގައި ތިބި ބައެއް

ލަދުވެތިކަމުގެ މޫނާއެކީ މުޖުތަމައު ގައި އެންމެން އެކީ
އަދަބާއި ސަދަބާ ނޯޅުވާ ތެދުވެރި އުޅުނު ސީދާ ބައެއް

މާތްމީހުނަށް މާތްކޮށްހިތާ އަދި އިހުތިރާމު އަދާކުރާ
ގާތްމީހުނާ ދުރުމީހުނަށް ކުލުނާ އެހީއާ ދިން ބައެއް

އުސްތާޛުނަށް ތިބެ ބޯލަނބާ ކިޔަވާ ކުދިން ތަރުބިޔަތުގާ
މުސްތަގުބަލެއް ހޯދަން އެދޭ މުސްލިމްލަގަބުގާ ތިބި ބައެއް

ތިއްބާ މިހެން ފުދި އުފަލުގައި ނިއުމަތުގެ ދެއްވެވި ހިޔަލުގައި
އިއްޒަތުގެ ހާލި އަތުން ބަޔަކު ރޫޅާލި މަންޒަރު ދުށްބައެއް

ޒާތީބިމެއްގާ އިންދި އާ ޕާޓީގެ ގަސްތައް ފޯދިފާ
އާފާތަކުން މޭވާ އަޅާ ރާހަތުގެ ހިތިރަހަ ލީ ބައެއް

އޭނާގެ ގަދަރަށް ފެންބޮވާ މީނާ އެ ގޮނޑިއަށް ހިތްގޮވާ
ދީނާ ދިވެހި ގައުމިއްޔަތަށް ވީގޮތް މިއީ ދެނެތިބި ބައެއް

ހައްގާއި އިންސާނިއްޔަތާ ހައްދާ ދެ ޖިންސުގެ ހަމަކަމާ
ދައްކާ ދަޅައިގެ ޑިމޮކްރަސީ ވައްދާލި ވަލަކަށް މީ ބައެއް

އެކުވެރިކަމުގެ ފެހިކޯޓުލާ ދެކޮޅުންކަމުން ފަހަތުން ދުވާ
އެކުވެރި ބަޔަކު ހެދި މަކަރުގައި މެކުމުން އަމާންކަން ނެތް ބައެއް

ފެންނާކަށެއް ކުރިމަގު ނެތޭ އަތުވާކަށެއް މާޒީ ނެތޭ
ވަންނާކަށެއް ނިވަލެއް ނެތޭ ކަންބޮޑުވެފާ އަދު ތިބި ބައެއް