ކޮންމެ ވާ ހިނިތުންވުމެއް އުފަލެއްކަމަށް ނުވެދާނެއޭ
ކޮންމެވެސް އަސަރެއް އެހެން އޭގައި ހިމެނި އޮވެދާނެއޭ
ލޯބިތޯ ނޫނީ އެއީ ނަފުރަތުގެ ތޯ ހިނިތުންވުމެއް
ހޯދުމަށް ފަހަރުގަ ފަސޭހަ ބަލާ ލޮލަށް ނުވެދާނެއޭ
އުފަލުގައި ވެސް ވޭނުގައި ވެސް ކަރުނަ ހިލެނީ އެއްމަގުން
އެފަދަ ކަރުނައިގާ ހަގީގަތް ވާ ނުވެސް އެނގިދާނެއޭ
ފެންނަހާ މޫނުން ފެވޭ ކުލަ އެއްގޮތޭ ހަމަ ހީވިއަސް
ފެންނަ ވިސްނުންތެރި ލޮލަށް ފަރަގެއް އެއިން ފެނިދާނެއޭ
ބަސްބުނާ މީހާގެ މޫނާ ބަސްމަގާ ގުޅުވާލިއަސް
ގަސްދުކުރެވޭ މާނަ ބަދަލުވެ އެކިގޮތަށް އޮވެދާނެއޭ
އެފަދަ އެކި ވާހަކަތަކުން މީހުންގެ ހިތް ހައްލާލައޭ
އެފަދަ ވަގުތަށް ހިތުގެ ލަގަނުން ހިތް ހިމޭން ވެވިދާނެއޭ
މިތުރުވެރި ކުލައާ އަމާން އަދި ހަތުރުވެރި ނާމާން ކަމާ
ފިޠުރަތުގެ މެޝިނުން ހަގީގަތް ރީތިކޮށް ބެލިދާނެއޭ
ނޫރު ނެތް ދުވަހާއި ހުރި ދުވަހާއި ކުރިމަތި ވާނެއޭ
ރޫޙު ނެތްނަމަ މުޅި ހަޔާތުން މީރުކަން ނެތިދާނެއޭ
ހިތް މަގޭ އެކަނިން އެކަނިވެލުމީ އަޖާއިބު ހާލަތެއް
ހިތް ހަނދާނުގެ ކާނިވަލަކަށް އެހިނދު ސިފަވެވިދާނެއޭ
ދުނިޔެއާ އުންމީދުތައް ހުރިހާ އެ ހިތް ދޫކޮށްލިއަސް
އުނި ނުވާހެން ހިތުގެ މަހެފިލް ދިރި އަބަދު އޮވެދާނެއޭ
