މިޤައުމުގެ އިޖުތިމާޢީ ރިވެތި ފޭރާން ވީދި ހަސްނެތުމުން
އަގާ ޤަދަރާ މިޤައުމުގެ ޢިއްޒަތާ ޝަރަފާ ދަނީ ނެތެމުން
މުއައްރިޚުނާއި ފަތުރުވެރިން ޒިޔާރަތްކުރި އެތައް ރަށަކަށް
ލިޔުންތަކުގައި ޤައުމުސިފަކުރި ރިވެތިސިފަތައް ދަނީ ނެތެމުން
ކޮބާނުކުރާ ހުތުރުކަމަކީ ކުރަންނުކެރޭ ނުބައި ކަމަކީ
އެބާވަތު ކަންކަމަށް ހިތްޖެހި ބިރެއްނެތި ތިބެ ދަނީކުރަމުން
މިހާދަށު ދަރަޖައަށް ޙާލަތު މިޤައުމުގެ ވެއްޓިގެންދިއުމުން
ކިހާދެރަހޭ ކިޔަންތިއްބާ ދަނީކުށްތައް އިތުރު ކުރަމުން
ރަލާއަދި މަސްތުވާ ތަކެތީގެ މައްސަލަ ހައްދުފަހަނައަޅާ
މުލުންލުހެވޭ ވަރަށްވުރެ މާފުނަށް މޫ ފެތުރިގެން ދިއުމުން
ވެފައި ނިސްބަތް ގުރޫޕުތަކަށް ތިބޭމީހުންގެ އަނިޔާތައް
ހިފައިގެންވަޅި ކަޓަރު ކަތިވަޅި އަޅައި މީހުން ދަނީ މަރަމުން
ނަހަމަ ޖިންސީގުޅުން ހިންގައި ދެޖިންސުގެ ކުޑަކުދިންނާ ބެހި
މިހެން ލިޔެލިޔެ ކޮޅުން ނުލެވޭނެހާ ގިނަކުށް ދަނީ ކުރަމުން
ގެވެށިއަނިޔާތަކާ އަދި ކުޑަކުދިންނަށް ބޮޑެތި އަނިޔާކޮށް
ދިވެހި މުޖުތަމައު ކަންބޮޑުވާ ހިސާބަށް އަދު އެކަން ދިޔުމުން
ވެފައިވާ ޢާންމު މަގުފޭރުން ކުރާ ވައްކަންތަކާ ކުދިބޮޑު
މުސާފިރުނަށް އަމާޒުކުރުން މިހާރު އިތުރުވަމުން ދިޔުމުން
ޤައުމުއޮތް ޙާލަތާމެދުގައި މިއަދު ކަންބޮޑުވެފައި މިވަނީ
އައުންއިސްލާޙު ހެޔޮބަދަލާ މިޤައުމަށް އެދި ދުޢާކުރަމުން
